[ابن عرفج]

السلام عليكم ورحمة الله وبركاته

أبناء العم

اهديكم احدى قصائدي وأخص بالإهداء صاحبي الغالي ناصر بن مطلق الحناكي السبيعي

وإن شاء الله تنال اعجاب الجميع

قصيدة عنونتها بـ حردان وهو لقب الجد الأول لناصر بن مطلق كما أن اللقب ورثه أخي وزميلي وصاحبي أبو مطلق وهذه كلمات بسيطة أمتدح بها نـــــاصـــــر بن مطلق الحنـــــاكي لمواقف عده أثلجت صدري وهي والله لا توفي حقه ولا توفي حقكم يا سبعان .....

حــــــــــــــــــــــــــــردان

وآقلبي اللي غـــــــــافل الهم همه = اللي ولا أحــــــــــد قد تجرى وذمه
طيب وأنا شفت مـــــا شفت طيبه = والناس تشهد والشهـــــــــادة مهمه
لكن عيني ما هي اللي اخبــــرها = زاغت على المظنـون ومست بهمه
ياويل حــــــــــالي ويلها يا محمد = ولوال قلب شـــــــــاف همه وغمه
داخل على الله يالنـــــداوي وبعده = عليك وأدخــــــل في كلامي واتمه
الله يخلي رايتــــك دوم بيضــــاء = ويبقي لك اللي رايتــــــك دوم همه
جيتك وانا ياصـــاحبي شف بالي = أبعد علي من الثريـــــــــــاء ومنبه
وأنا مـــرادي في عيوني وأشوفه = اقرب من لسان الشفـــــــاوي لفمه
ياعـــوزة الأقـــــــدار للي زملها = اللي يدور مــــــــــــا لقى له مزمه
يا كم يمنــــا متنهـــــــــا ماتبختر = لا شمرت الذرعان مهنــــاك خمه
لا شفتها كنك تشوفه خيــــــــرها = يعجبك مظهرها وهي مــاش همه
الله من يـــــوم تجــــــــاذب همنا = ما طال لا هم ولا طـــــــــال رمه
والله من يمنــــــا ترثي حـــالهــا = ترثي قليب مــــــــــا يفيض مجمه
يا عل يمنا ما يعزك فعـلـهــــــــا = تنقـــــــــاد لأسفل درك ذل ومذمه
يا صاحبي مهناك يــاويش عندك = لا صار لك عندي قـــــدر ومحمه
لا تنطوي عني وأنـــا فيك عاشم = حتى وأنا محشـــوم ذبيت لك عمه
يا صاحبي بسلاك عطني همومك = وأعطيك قلب مـات من زود همه
وأنا ترى مــاهــوب وايات واحد = أفرغ له المكنـــــون وأنصاع يمه
لكن ما غيــــرك له القلب ينزوي = لا ناح قلب بيح الســـــــــــد غمه
ولا أنت محد يســـــــاويك عندي = مستثنين ما بين هالنـــــــاس جمه
يا للي سراة البيد ترثي خصومك = تاوي سليل سبيــــــع وقت الملمه
لو هي سبيعه عن بكـــــاير أبوها = من حايد النهرين وعيـــــال عمه
لو هي تعزوى ما تعزوى الا بكم = حيث إنكم لسبيع فخـــــر ومزمه
العـــــز عزكــم والصيت صيتكم = والخير منكم أزرت يدينــــا تلمه
لا قـالـــــــوا سبيعه قلنا بني عمر = هذيك من ذي وحد العـــرق دمه
ولا قالوا بني عمر قلنا بني ثــور = فرع الزكور ومـــارد البير جمه
ولا قالوا بني ثور قلت العتــــايقه = هم صفوة السبعــــان ولهم متمه
عيال مطلق جمل الله حــــــــالهم = اللي جمايلهـــم على الراس عمه
هيف الميامن بـــاخصينه جودهم = ذخر اليتاما والمســـــــاكين جمه
ريف الضعــــوف مزبنين اللحى = غيث الجلــــوة لا سرى بالمهمـه
طوال الصوايد عـز من لا عز له = لا لاحت الرايــات وقت المطمه
عطاب الضرايب لا تولى زحفهم = فتخان الأيدي لا ارجهــنت ملمه
تشهــد لهم الـــرس ومـــــــا حولها = وتشهد لهم نجــــــــد واللي تضمه
نـــاصر ولــــد مطلـق عريب الثناء = حردان جده وأبو هاجـــوس عمه
حــرار قــــوم مايجـــــــــابه طيبهم = لا والله ألا الطيب ننـقــــــــاد يمه
ما نشكي العسرات نقوى ضيمهــــا = ولا نشكي العوجـات وهناك زمه
حردان حردان الحنــــــــاكي دونها = راع الذرابــــه زلـم فســـــار كمه
لا صرت أنا عنده وهو صار عندي = في مجلس مــــا شفت منهو يذمه
أشــــوف أنا الجاش يا زين طاروق = وأشوف هجس يبـــــدع القيل فمه
ناصر اليــا منه تتبـــــــاهت سوالفه = اشوف أنا المسباح ينقـــــــاد يمه
وأشوف ويش أشوف لا شفت ناصر = إلا الله أكرم هذاك الوجه والعمه
المجلس اللي مـــــا جلس به سبيعي = مثل القليـــب اللي خـــلي مجمه
وختامها صلـــــوا على النبي محمد = عداد وبل طاح من بعــــــد غمه

وسلااااامتكم

إخوكم / سامي بن صالح العرفج آلبوحسن آلبوعليان التميمي