[وافي السبـيعي]

اكتب ويكتب لى وانا اقول حتيش = حبر على قرطاس ماهوب كافى
والوضع ماهو قابل للمطاريش = يامير بشرنى عساها عوافى
سجيت يوم غصون قلبي مواريش = واليوم يافرز الوغى شاب قافى
عروق قلبي يالسديري معاطيش = أمشى وانا مقفى واعين خلافى
رافقت حجاج الهنود الدراويش = وسريت مسرى الذيب رجلى وحافى
وطال المسير وصار بالجو تشويش =متى على الله يصبح الجو صافي
شي يخدش تومة القلب تخديش = وسره يعود الى القلوب النظافى
يكفيك لايح كلمتى دون تفتيش = وعندك خبر ماقال صقر النصافى
ومادام أنا قلبى جزوع الى نيش = حساس من كلمه سريع العيافى
ارض خلا لوما بها لقمة العيش = اخير من رزق عليه اختلافى
والرمز يكفى الحر والخاتمه ويش = واقبل تحياتي وانا شاب قافى