والله لول الشعر والبر والطير = أدله بها لا ضيق الوقت بالي
والرابعه رفقت أرجال المناعير = كسابة الطوله قروم الرجالي
تبعد عن الهاجس جميع التفاكير = دايم بها بالي من الهم سالي
ولاترى دنيا الشقى مابها خير = لاهيب لامكسب ولاراس مالي
وش عاد لو تملك كنوز وقناطير = مادام عمرك مقتفيه الزوالي
مادام راسي حي وأقدامي تسير = والله لسيرها جنوب وشمالي
قلبي يحب البر وقت المخاضير = لاقرنس النادر وجالي مجالي
ونقلت حام الشوع عوق المعاشير = ومن عقب تدهيله دعيته وجالي
وجا للحباري يم سنار تذكير = ولذكرهن قمنا نشد الرحالي
فوق الجيوب مقربات المشاوير = من فوقهن يازين مزح العيالي
قروم العيال أهل الوجيه المسافير = مامنهم اللي فالزوم اتكالي
سارين باول ليل وهالحينه عصير = وكلٍ على الحروه تبين بعالي
وفرع بحرٍ كن عينه لهب كير = يرمق بها اللي في بعيد المفالي
عوق الطيار ان كان قفن مدابير = وان كوبر الحفال عطب المدالي
وزالت لعينه ثم قفيته السير = ومن قو ضربة كفه الدم سالي
عاق المطرف والبقيه مخامير = وجال النشامى فالبقيه تسالي
والنار شبت في جلال الجثامير = وتقدم النشمي لصفر الدلالي
وقدم العشى ساق الدلال المباهير = ودارت سواليف الرجال الجزالي
والكيف طاب وسانحن التعابير = وجال القوافي فالضمير اجتوالي
وصخر محمد عاصي القاف تصخير = وأنا شريت وبعت في سوق غالي
هاذي طرات العمر مامقصدي غير = اليا تهيت ياكرام السبالي
الصراحة انها قصيدة جزله ومن شاعر جزل
بارك الله فييك على هذا النقل الجميل