[ماضي المديري]

يارايح مني تبي الحايـر اعصيـر=من فوق جيب وارداتـه اجـدادي
مقصدك ديرة مرهبيـن الطوابيـر=عزه هل العـزه ليـوث الطـرادي
ديرة هل العادات والسقم والخيـر=خير الرفيق وسقم عين المعـادي
مني لهم طيبٍ وحشمـه وتقديـر=ارسلتها لاشك تمشـي اعمـادي
وانقل سلامي للوجيـه المسافيـر=اللابه الي عـن شرفهـا تفـادي
سلامٍ احلا من حليـب المصاغيـر=مرباعهن الصلب عقـب البـرادي
يرعن في روض زهت بالنواويـر=في جالها تلقـا النفـل والزبـادي
واختص راعي الطيب زبن المناعير=الي نزل بالعـز فـوق الشـدادي
هذاك ولد ادهيم ريـف المعاسيـر=من عاد فعل امفـرجٍ والمهـادي
عزالله انه عادهـا طيـب الصيـر=وانا نحسـب السالفـه ماتعـادي
العفو عند المقدره ياعـرب غيـر=لاشـك شيمـة طيبيـن المبـادي
مافكها من شـان جـاه ودنانيـر=يوم رقبة جـاره لـك الله تقـادي
يوم ان ابن جاره رمتـه المقاديـر=فكـه لوجـه الله رب العـبـادي
ماطول الدعوى وجـاب المعاذيـر=ولاردهـا للدفنسـه والــدوادي
هذا كـلام الحـق مافيـه تزويـر=تنشر له البيضا على كـل بـادي
هذي فعول الغانميـن المشاهيـر=نادى بذكـره فالجمـوع المنـادي
وسط الجريده طلعـو لـه تقاريـر=واخذ وسـام الطيبـه والسـدادي
من كف سلمان العرب راعي الخير=ابوفهـد لاشـك ماهـوب عـادي
تفخر به الغلباء من السيف للنيـر=وارض الحجاز وكل شعـبٍ ووادي
ويفخر به الي وسط راسه سعاطير=الي يعـد الحـق وسـط البـلادي
واختام هذي عـد ماغـرد الطيـر=صلوا على الي صار للحق هـادي