بسم الله الرحمن الرحيم
قصيدة للشاعر / شباب بن ذياب بن جزله المديري
بمناسبة احتفال قبيلة بني ثور بعيد الفطر المبارك
الثلاثاء 2_10_1427هـ
الوقفه اللي قدمكم جالها دور= ابي اعتبرها وقفةٍ عالميه
وانا بشر والبشر منهي ومامور= متعرضن بين القضاء والقضيه
عسى العمل مقبول والذنب مغفور= يالله لاتكتب علينا خطيه
من حشمة اهل الحفل جينا على الفور= وعندي لعطران الشوارب هديه
مثايلٍ من قلب وافكار وشعور= مثل الذهب في خزنة الصيرفيه
دعوتك جتني ياابيض الوجه مشكور= مشكور ياعساف زبن الونيه
بيتك قبل مفتوح في عسر ويسور= كنه مظوف اثليم ذيك السنيه
فيه الشحم ماجود والكيف منحور= والعود الازرق يتبع الشاذليه
ومجالسٍ يطربلها كل منعور= ومفطحاتٍ يهزعن الصنيه
يفداك من بيته مقفل ومهجور= عسى بخيل الناس تحت احذيه
وربعك هل الناموس غياب وحضور= وقول الصراحه يرفع المعنويه
تاريخهم في صفحة المجد مسطور= وفعول بني ثور ماهي غبيه
لاصاح صياحاً من الظد مذعور= ترعابهم فالخوف كل اعربيه
وهب النسيم وذعذع الورد بزهور= وشاركة فالحفله بصوت اعمريه
في حفلة الحضبي وربعه بني ثور= يقول ابن جزلة سلام وتحيه
تحيةٍ يجيلها بالدجا نور= يدريبها الحاضر وسبع اللفيه
يقول الاول ماعن الخور مذخور= ومقابل اهل الطيب حقٍ عليه
وابرك سنه وابرك عيادات وشهور= ليلاً جمع كل الوجيه الرضيه
وحنا سبيع منزحة كل طابور= وحنا سبيع اهل الظفر والحميه
وحنا اليامن قلطو جمع وسبور= نارد حياض الموت ورد الظميه
واليا وردنا نشبع اسباع ونصور= يوم الحروب وفوظة الجاهليه
وحنا اليا رد البرا علة انحور= حريبنا دايم جروحه خفيه
وعدونا يصبرعلى الغبن مقهور= ماعاد له فينا روابع ونيه
واليا حصل بين الحفيفين محذور= جمعٍ غزانا مابقاله بقيه
كم بيرقٍ جانا مع الصبح منشور= غازن على الخرمه بقومٍ لظيه
وحنا هل الخرمه وحنا لها صور= وحنا حرارٍ فااللقى صيرميه
ومن غب كونه عود الجمع مكسور= الحظ طيب والعزايم قويه
ولا رفعت الرايات حنا هل الشور= في مقدم البيرق نقود الغزيه
وكسيرنا مايجبره كل دكتور= لامن ركبنا فوق بنت العبيه
وحنا هل النخوه على خير وشرور= عاداتنا من يوم بقعا صبيه
يشهد لنا حوقان والحنو مذكور= ويشهد لنا التاريخ في كل هيه
ودخيلنا يامن من الغدر والجور= ماهوب خايف لو يشوف ادوميه
ورجالنا لو كان ميت ومقبور= يدخل دخيله كن الارواح حيه
وخوينا يرتاح باله ومسرور= لحيث بعض الناس يؤذي خويه
والضيف له ببيوتنا كل ميسور= مستانسٍ وسط البيوت الذريه
وحنا على الجيران جنات ونهور= كنا موصينن عليهم وصيه
ودستورنا القران عن كل دستور= الشان واحد كلنا حنبليه
هذي فعول سبيع والكل مخبور= السلم طيب والمذاهب نقيه
والمعذره كانه حصل نقص وقصور= وصلو على المختار سيد البريه
وصلاة ربي عد ماهل شختور= واعداد ماهلت امزون الرفيه