[بدر محمدالسبيعي]

السلام عليكم ورحمة الله وبركاته

بدون مقدمات 000 للتواصل :

ياشينها لامن حظ الكفو مال=وحظ الردي قايم ولاجاه ميله
بعض الحظوظ تخلي الخبل رجال=وتحطه اطيب شخص من بين جيله
لو كان ماينباع فالسوق بريال=ويفر عينه مثل عين ( الحسـ 0000 )
جثه عليها ثوب وشماغ وعقال=وليا انبقط بالهرج مافيه حيله
يالله دخيلك من ترداية الحال=ويالله دخيلك من دروب الفشيله
في عالم ٍ مايعترف كود بالمال=يعني على موتر جديد ٍ مديله
ولا00 على منصب كبير ٍ وفعال=تحتاجك العالم بنفس ٍ ذليله
أما كذا ولا 00فخلك على الجال= ( وراك عيشه ) فنت راعي جميله
من قال هذي المرجله بس من قال=المرجله فعل ٍ موضح دليله
لايازمان المصلحه والتحيال=لاتهضم حقوق الرجال الاصيله
اللي لهم في صفحة الطيب منزال=اهل العلوم الطيبات الجزيله
راعي المراجل للصعيبات جمال=الله يعينه بالحمول الثقيله
معنز ٍ من جد من عم من خال=قرم ٍ مهيل ٍ من قروم ٍ مهيله
يفدونه رخوم ودنافيس وانذال=وتفداه زند ٍ ماتشب الفتيله
قول وفعل والقول مثبوت بفعال=القول يفنى والفعل من يزيله
رزقه على اللي ثبت الارض بجبال=ماهوب من عند اليدين البخيله
وان كان مال الحظ ياطيب الفال=مالك على تعديل حظك وسيله
اصبر وربك مايخيب للامال=ماغير ربك واحد ٍ تشتكيله
لكن والله مايكدر لي البال=ويضيقه في كل يوم ٍ وليله
الا00 ليامن شفت حظ الكفو مال=وحظ الردي قايم ولاجاه ميله

ولكم اطيب تحيه