[فـــالح السبيعي]

يقولك

كان فيه واحد " على نياته " .. جرّب يستثمرأمواله
وكان عنده ببغاء يتكلم ..
لكن مشكلة الببغاء .. إنه كل ما شاف راعيه قال : ياغبي .. يا غبي .. يا غبي ! ..
راعيه ضاق صدره .. وقرر ياخذ الببغاء لمدرب الطيور علشان يعدّله ..

يا مدرب الطيور .. شف لك صرفة مع هذا الببغاء ..
كل ما شافني فشلني عند الناس " غبي ، غبي " !
أبيك تدربه زين وتعدّل كلامه .. علشان يغيّر هالكلمات الي يرددها كل ما شافني ..

قال المدرب : ما عليك .. خلّه عندي كم يوم ..

ولما راح راعيه .. جاب المدرب " سطل " مويه حاااارة .. وحطه قدامه ..
وسأل الببغاء ..

أنا مين ؟!
قال الببغاء : أنت صديق الغبي ! ..

وينزله المدرب في المويه الحاااره ثم يطلّعه .. ويسأله ..

أنا مين ؟
قال : أنت صديق الغبي ..

وينزله في الموية مرة ثانية .. ثم يطلعه ..

أنا مين ؟
وعلى هالحال .. حتى تربى الببغاء وتسنّع ..

أخيرا .. قال له المدرب ..
أنا مين ؟!
قال الببغاء : أنت صديق أذكى واحد في العالم ..

ويوم جا راعي الببغاء .. قال المدرب : تفضل اسأله ..

قال راعي الببغاء .. : أنا مين ؟!
قال الببغاء : أنت مين ؟! وهذا سؤال !! ..
أنت الذكي .. إلا أنت أذكى واحد عرفته في حياتي !

قال له راعيه : .. طيّب .. وإذا لعبت بفلوسي على كيفي ؟!
قال الببغاء : .. هذي فلوسك .. من عرق جبينك .. تسوي فيها اللي تبي ..

قال : طيّب .. إذا دخّلت فلوسي عند " هابتكو " ؟!
قال الببغاء : ممتاز .. حركة استثمارية في غاية الذكاء ..
ومن أذكى واحد في العالم ..

قال: طيّب ... وإذا دخلت فلوسي عند " الجمعة " ؟ ..
قال الببغاء: طبيعي .. تنويع استثماري .. من أذكى واحد في العالم !

قال: طيّب .. وإذا دخلت فلوسي عند " ابن حسن " ؟..
قال الببغاء: ذكاء خارق .. وماشي مع الحكمة اللي تقول
" لا تحط البيض في سلة واحدة " .. فعلا أذكى واحد في العالم !

قال: طيّب .. وإذا دخلت فلوسي عند " العيد " ؟ ..
قال الببغاء: عادي .. وزي ما يقولون " حشر مع الناس عيد " ..
صحيح إنك أذكى واحد في العالم ..

قال: .. طيّب .. وإذا دخلت فلوسي في الأسهم ؟!
قال الببغاء : يا عمي هاااات الموية ! ..
قايلّك هذا أغبى وأدبش واحد في العالم !! ..