[خيَّال الغلباء]

بسم الله الرحمن الرحيم

ياشيب عيني نومى البارحه زال = سهرت ليلي والدموع أجوديه

من موقف كنه علي القلب زلزال= هز الضلوع وزود القلب كيه

قالوا : توفي البارحه طيب الفال = وأصيح كن أبوي مات بيديه

رحت وفزعت وشفت أنا شيوخ ورجال= تبكي وأنا دمعات عيني سقيه

وأقول في نفسي صدق واحدن قال = ياما رجال تموت لكن حيه

عز الله ان سبيع تبكي لرجال = له بينهم كلمه وله مقدريه

راح الكريم اللي مع العم والخال= اللي يموت ولا يشوف الخطيه

يا خالد أصبر والزمن قصر لو طال = ونفوسنا بتذوق كاس المنيه

أنا أدري ان الهم في قلبك جبال = وانك فقدت اللي علومه وفيه

فإدع الله انه يسكنه خير منزال = بين الصحابه في الجنان الغنيه

وياناصر أصبر والصبر يشرح البال = والصبر من طبع الرجال القويه

اللي تصلي الخمس وتعرف الامثال = وتحفظ كلام الله وسنه نبيه

يالله يارحمن ياخير حلال = ترحم عزيز النفس راعي الحميه

وتجبر عزا اللي حقهم قدر واجلال = اللي_ ورب البيت _مني وفيه

اللي فداهم مني النفس والمال = واللي يجيهم كنه الا عليه

وان ما عطيت لخالد وناصر الحال = وش فايدة مدح الخوي في خويه

الاخ ابو عزوز بيض الله وجهك على نقل مرثية مسفر بن صالح القحطاني في الشاعر محسن بن جغيثم رحمه الله والسلام