[مبارك البخيت]

جــــديـــــد ..

لا من بغيت أقصد وأسوي لي أبيات=أخاف غيري واحدٍ ينتسبها
وأنا قصيدي ما يجي كل الأوقات=ولا أبدا القصيدة لين يبدا نشبها
أقصد بعض ساعات وأسج ساعات=ولا جيتها حتى يجيني طلبها
والشعر عندي له مواقف وحزّات=وقصيدتي ما أجيبها مغتصبها
ولا رحت أكبّر سمعتي بالمجلاّت=ولا نيب ألفّق هرجتي وأكتسبها
لا خمّني هاجوس من غير ميقات=أجيبها ماني بروح أخطبها
والشعر له في بعض الأحيان وقفات=ينشب بها اللي ما يميّز نشبها
والشعر يحصل به مواقف صعيبات=يتعب بها اللي ما يقدّر تعبها
والشعر يقضى به مواقف صعيبات=خزنة ذهب كلٍ يدوّر ذهبها
ماهو مجرّد هرج فوق المنصّات=ولا خو جلوبة من بغاها جلبها
ويطلّعه طول المدى والمسافات=ولا هوب لعبة من بغاها لعبها
وأنا قصيدي ما يجي بالبروفات=أحفظ معاني هرجتي وأحسبها
ولا رحت أطلّع صورتي بالقنَوات=والمطربة ما رحت أتابع طربها
كم شاعرٍ قد رشّحة كثر الأصوات=والشعر فيه ارضا النفوس وغضبها
أصبر على ما صار وأكب ما فات=وأسمع بها وأشوفها واجتنبها
ولا به حصانٍ كود قد جاه كبوات=ولا فيه نارٍ ما يدخّن حطبها
والرابح اللي يعتني بالصلوات=ومن رافق الجربا يحوشه جربها
والذكر يبقى حي لو صاحبه مات=وكلٍ يرقّع كذبته لا كذبها
يا الله طلبتك يا بديع السماوات=تصون نفسي من الخطا وتحجبها

وسلامة الجميع ..