يوم الهواجيس تقبل بي وتقفي بي=وحروفها صادقه ماهيب كذابه
أفكارها صرت أرتبها بترتيبي=حتى نديم القصيد تحصل إعجابه
الشعر ماقلته أطلب به مطاليبي=ولا كتبته على شان أتسلابه
ولادعتني على الخطوه مناديبي=في اللحظه اللي تجي للشعر غصابه
يابويزيد السوالف والهناديبي=تشرح خفايا أديب الشعر وآدابه
إحساسه مصوره والموقف صعيبي=وعرفت فحوى كلامه بعد ما جابه
عن بعض الأصحاب مايستانس يغيبي=وأنا لبعض العرب يزعجني غيابه
رفيقي اللي يباريني على الطيبي=حرٍ شهر فوق جزل الصيد مخلابه
مع شدة الوقت أخذت أطيب مكاسيبي=مع الأسود الضواري داخل الغابه
والعلم واضح من أيامي وتجريبي=جربتها مع زمانٍ فاتح كتابه
جربتها بأربع سنينٍ تعجايبي=يوم إن قوة حبال الشوق جذابه
تنام في الفكر قوتها وتصحي بي=وأذكر بها كل من دقت على بابه