ياليت الحب يسأل ويتكلم = عن اللي صار في قلب الهواوي
يجاوبني عن جروحٍ تألّم = جروحٍ طيرت عقل الشقاوي
سبب من ساس بالحب وتعلم = بعد شوفه وضيعت العزاوي
بعد شوفه ولو صرت أتحلم = تصير حلومه لروحي مناوي
أبو شعرن على أردافه مقلّم = أبو عينٍ مثل عين النداوي
ضرب قلبي كذا ضربة معلم = وبعدها طحت في الأرض متساوي
طبع بإسمه على قلبي وعلّم = وطاحت مع هقاويه الهقاوي
وقعد يضحك بعد فعله وسلم = علي وقلت جرحي يامداوي
وقال الحب مابعده تظّلُم = وواحد ضرب واحد كم يساوي