[السبع الحر]

قصيده لشاعر سعد علوش احد شعراء الغزل وتوبة من كل حرف

من كل حرف وكل شهوة صبابه = أستغفر الله وأتعوذ من ابليس
أعوذ باللي اوى عبد وسرا به = لاجى نهار الحشر خلف امرئ القيس
يارب يارب الكرم والمهابه = يالي لك اعلام الاوادم مناكيس
جردني من النابيه والسبابه = ولبسني من دروع هديك متاريس
تعبت من مسك القلم والكتابه = والشعر وفتن النسا والاباليس
والمدح في عزوه وشيخ وقرابه = واللاء .. لدعوات الرضيين والليس
والحب وماحوله وماله وهابه = والدمع لا هبت علي النسانيس
والشوق وغفال العقل وانغلابه = والليل وخطط الدها . . والجواسيس
والشهرة وحكي العرب واللبابه = وزملوق شف ما تعسه عواسيس
وحصر اسمي فشاعر فساحة غرابه = شعارها فيهم رخوم وملاحيس
وانا لعطاش الاوادم سحابه = ومن خلقتي ما قد وطيت الدنافيس
تاكي على ارث الاسم بالنيابه = واقطف خلاصة ما اغرسوه الغواريس
احسبني فايز بالرضا والذرابه = واثري مثل من يحصر النور في كيس
اقفي من الله والامل والرضا به = واروح ادور من ورا ابليس احاسيس
اسهر على فن الكلم والخطابه = واصبح ولين اللي جمعته حماليس
قلبي لعزف الاوادم ربابه = وراسي لخطوات الشطانه دواعيس
تقودني نفسي ولا اشعر ولا ابه = مالت عليها عاصيات الهواجيس
من عنده ان كل الشعور يتشابه = روس مع اللي في الدحادر مراويس
الاثم ما حاكه في خفوق وخفا به = والخير ما شاعته روس النواميس
كم شي صار وصار ما يندرا به = وكم نومة ماكدرتها كوابيس
ترى ما احد له في رقبتي طلابه = بس الصراحه من شم الفواعيس
والرجل اذا ما يعتبر في شبابه = يعيب قبل يشيب ويشيب ويخيس
ياراجي ارجي اللي ما ينصك بابه = لا ترجي الوهبات من هيس ابن هيس
استغفر الله واتتقى عذابه = اللي فرقني عن حياة المتاعيس
من قبل لا اعرف الهدى واعنا به = انا وهمي والحزن face to face
والحين لله . . الفضل والا نابه = متعافي . . ويمشي على زندي التيس
هادي . . يشوشني طزيز الذبابه = لا عد لايام الغبيه ولا اقيس
شريت عقلي في سؤال واجابه = انا اعبد الله . . والا اعبد الوساويس ؟
لذة خفوقي وانجلاية ضبابه = سجدات ليل ظالمينه مناعيس
فاجواء مكه والحرم والرحابه = لا يا بعد روما ولندن وباريس
هذي ديار المصطفى والصحابه = وهذيك دار ابليس وعويل ابليس