[خيَّال الغلباء]

بسمك الله ابتدي بالتحيّه والسلام=يا سلام الله على يام قاهرة الخصيم
ثم أثنّيها لظفير ابمحبّه واحترام=والمعزّه والغلا والوفا لأبنا تميم
ويا سلام الله على سبيع درعي والحزام=أفتخر وأفخر بها وآرد البحر الطميم
ليت ابن شلحاط ماهوب من صبيان يام=الرجال أهل الوفا ما يمثّلها لئيم
شاعرٍ شحّاذ ماخذ على الشحذه وسام=ما ينومس روس ربعه ولا يِطعم يتيم
دفش قومٍ ما يميّز حلالٍ من حرام=في بحور الذل والدنفسه نفسه تهيم
ايتباها يحسب إنّه على كور السنام=ما درى أن الهرج كثره من طبوع الحريم
بينه وبين السفاهه مودّه وانسجام=شاعرٍ من كثرة البلبله عقله سقيم
المواقف مالها إلا امروّين الحسام=وأنت مانتب لا شجاعٍ ولا رجلٍ فهيم
اخس واعقب ما أنت كفوٍ وندٍ للحشام=أشهد إنك هيس وإنك ردْي مانتب حشيم
كيف تدخل معركه وأنت ما تقوا الزحام=يا صغير العقل ماللعظام إلا العظيم
ما يزعزع وحدة الصف هرجك يالخمام=القبايل كلها صف واحد يا ذميم
كلبونا صف واحد تحت راية لإمام=ما يفرّق بيننا كود شيطانٍ رجيم
المجوسي لو قدر يدخل البيت الحرام=كان شبّ النار ما بين زمزم والحطيم
والبدايه والنهايه سلام الله سلام=تلتطم لأمواج والرب بالنيّه عليم

أخي الكريم / شافي بن عميش بعد السلام بيض الله وجهك وصح لسان الشاعر / سالم بن فهد السبيعي وسلم نبضه وبنانه وإعتلا شانه وابن شلحاط يستاهل ما جاه لأن البادي أظلم ومن انتصف ما ظلم والله يعافيك ويبارك فيك ويجزاك خيرا هذا وتقبل فائق الشكر والإمتنان مقرونا بجزيل المحبة والاحترام واسلم وسلم والسلام .