السلام عليكم ورحمة الله وبركاته
أعزائي اعضاء منتدى القبيلة الغالي
هذه قصيدة جزله من لسان جزل
واتمنى ان تنال على اعجابكم
الليل لاعسعس نجومـه درابيـل=تكشف بقايا السالفه والفضيحـه
والصبح يتنفس على ريحة الهيل=يشتاق لعلوم النشامى الصحيحـه
والكبر ( آفه) والدناوة غرابيـل=والـذم طبـعٍ للوجيـه الكليحـه
الزود يبشر صاحبـه بالبهاذيـل=مجنون منهو ما استمع للنصيحه
شخصٍ جفته المرجله والرجاجيل=هرجه كثيرٍ والصمايـل شحيحـه
الجرم وافي لكن العقل بـه ميـل=يكذب وكذبه بيـنٍ مـن فحيحـه
هماز.. لمازٍ.. قليـل المحاصيـل=عتلٍ.. عليلٍ دوم نفسه كسيحـه
(رفيق للشيطـان) نقـال للقيـل=ماشاف له خير ولا شـم ريحـه
فكره عليل.. وزاده الكبر تعليـل =الناس تضحك به وهي مستريحه
جنسه ذروقٍ مثل صوايـة الليـل=من ذم فعله ياعسـى الله يبيحـه
ماينفع (الأفاك) كثـر التهاويـل=زيفه تبيـن ولفضتـه الفسيحـه
مافي يده دبره ولا في يده حيـل=قلـه تـريـح الاوادم مريـحـه
وقله قصيده والحكي والمواويـل=مترديه وحده.. والاخرى نطيحه
وقله ترانا نبخص الجدي وسهيل=نسبر مطاليعه ونعـرف مطيحـه
وقله ترانا من عصـاةٍ مشاكيـل=نطـرخ بعـزٍ كاسبيـنٍ مديحـه
وقلـه ترانـا مانهـز الفناجيـل=إلا بوجه إللـي علومـه قبيحـه
وقله ترى كثر البكـا والسعابيـل=ماعز شخصٍ يطحس في مطيحه
وقله يجوز ويترك القال والقيـل=ليه المروه عرضها يستبيحـه؟!
وقله يسد بغترته جاري السيـل=يقطعك يسرىً دلوهـا ماتميحـه
العمر يفنـى والليالـي مقابيـل=وكلٍ يحاسب لادفن في ضريحـه
يامن نشدني عن جميع التفاصيل=جتك العلوم الوافيـه والصريحـه
وعيبٍ علي إني اجاري مهابيـل=لكن عصت شوري بيوت القريحه
هذا وصلى الله على سيد الجيـل=إعداد ما ينبت من الغيث شيحـه
صح لسان الشاعر ( راعي مرات ) :~ عبدالرحمن بن عبدالله المجلي السبيعي