كفو بسبيع وكفو بالدواسر وكفو بقبايل الجزيرة كلها ولي تعليق على وسم العصا
وسم العصا المعروف والمشهور هو لقبيلة الدواسر بدون منافس مهما حصل بعدهم فهم اهل السبق في ذلك يقول الشاعر مانع العجمي:-
تغنيت باسم اعجيم جدي وجـدي يـام *** ومن ديرة الدامر بسـوق القـدم يمـه
الى وادي العود الفحل دوسر الضرغـام *** راع الوادي المسمى مهو وادي الرّمـه
ظنا زايد وتغلب اتحط العلـوم اقسـام *** كلام عليـه الحلـف والنـذر والذمـه
تعنا الشريف لدارهـم معتليـه اعـرام *** وردت عزاويـه بعـد جورهـم ياامـه
تعدا القبايـل ساكنـه يبتحـص قـدام *** وبعد ماوصلهم قصوا اشنابـه وكمـه
فهم مزبن الساطي وهم ملتجا المنضام *** وهم فزعة المضهود هم نقـوة الامـه
وهم ملتقا الهاشل وهم نصرة الاسـلام *** وهم مدت المحتاج هـم للخـوي دمـه
وهم حكمة المجلس وهم عزوة الزهـام *** وهم ضحكة الحجان هم للعـدو غمـه
وصاة الرسول ابجارهم طبقت باحكـام *** وكنه يخص الدوسـري خيـرة الامـه
يسوقون جار البيت لو صابته الاسهام *** ويدله غريب الـدار معهـم ولا همـه
ووسم العصا ما احدٍ سبقهم عليه اشمام (1) *** اهنا الفرق يااللي تحفظ العلم واتضمـه
هل البل حماة الغرس لو ركزت الاعلام *** حما دارهـم لوجّـرت الضـد ملتمـه
والقصائد في ذلك كثيرة وتتعدى العشرات من كبار الشعراء من الدواسر وغيرهم ، وأن ينسب سلم قبيلة لقبيلة أخرى فهذا غير طيب ولا ترضا به القبايل الطيبة وكلن له سلومه.
وقبل حوالي سنتين تغنى شاعر الوطن خلف بن هذال في مزاين عتيبة بقصيدة غزل في امرأة جائته تريد فزعة في زوجها المسجون فقال هذه الأبيات ونسب (وسم العصا) لعتيبة مما جعل شعراء الدواسر يردون عليه وجعل عقلاء عتيبة يستنكرون ذلك من خلف بن هذال وأول من نفى (وسم العصا) عن عتيبة هو الشاعر الكبير عبدالله بن عون حينما كان يمازح الشاعر حسين بن ضيف الله الكبرا الدوسري بقوله:
ما نزلنا الهدب ياحسين معكم بالقصير = ولا وسمت عصينا مثل من تاسم عصاه
نرجع لخلف بن هذال حيث قال في أبياته:
يابنت مانرضى المهونة والاضعاف
لنا على روس (المشاميخ) صيحة
لاتنشدين اعن المنازل والاسلاف
يوم أذكر الماضي تهيج القريحـة
فينا صفات الطيب يابنت واوصاف
ماتنطبـق فـي غيرنـا يامليحـة
ادخيلنا يرقد ورا الوجـه ماخـاب
يامن وتحماه السلـوم الصريحـة
ناسم عصاه ولو يبا حق وانصاف
تحت الحما ماواحـدن يستبيحـه
وقام شعراء كثر بالرد عليه لأنه نسب سلم قبيلة لأخرى ، وهذا رد للشاعر ماجد بن عيسى بن خفران المسعري على خلف :
يقـول مـن يــارد بقـولـه وينـشـاف
قـدم الرجـال أهـل الوجيـه الفليـحـه
أبني على ساسـاً مـن الحيـد مرصـاف
وارفـع صروحـاً فالـعـلال المشيـحـه
واليا صرفت أرهي علـى كـل صـرّاف
فكـري ورى سبـح الكواكـب سبيـحـه
طوفان جاشي لا اصطفق واعصف اعصاف
تهـتـز مـنـه الراسـيـات الرزيـحـه
عديت مـن شـرع المعرْفـة والانصـاف
رداً يـخـط بـكـل بيـضـاء صفيـحـه
خـذ يا(خلـف هـذال) رداً علـى القـاف
الـلـي تمثلـتـه بنـفـسـاً بجـيـحـه
وزنك طفح كيلـه علـى ميـل واجحـاف
وزليـت لـك زلــة لسـانـاً جويـحـه
نحسبـك كـان مـن العواريـف عـرّاف
ليـن إن منـك العلـم بـايـن نضيـحـه
عليـك مشروهـاً كبـر عـوف وأكتـاف
عمـد الخطايـا إمـن الصفـات القبيحـه
لو اختصرت بمـدح مجمـول الاوصـاف
وتفصيـل زيـن ام الخـدود المضيـحـه
مـا لحقتـك شرهـة ولا منطقـاً حــاف
ولا طحت فـي مـوج الخطايـا القديحـة
لكـن فـي مدحـك لربـعـك تــزلاّف
علـى السلـوم الواضحـات الصحيـحـه
وربعك (عتيبـة) مرويـة حـد الأسـلاف
أهـل الـوزان اللـي كففهـم رجيـحـه
واهل الفخر والمـدح فـي كـل الاوقـاف
واهـل السلـوم الوافـيـات الوضيـحـه
لطامـة العايـل بضـربـات الاعـنـاف
وذبـاحـة الحـايـل بيمـنـاً سميـحـه
ما يكتسـون إمـن العـواري والأسـلاف
وأمجادهـم مـن قبـل مدحـك مديـحـه
وش وصلّـك حـد الطمـع والتزّهـاف ؟!
تنقش على ( وسم العصا ) لـك نقيحـه !
( وسم العصا ) سلم لمـن مجدهـم نـاف!
روس الجبـال الراسـيـات المصيـحـه
(سلم الدواسـر) مـن قديمـات الأسـلاف
ولا يقـدر أحــدن غيـرنـا يستبيـحـه
لـو ياخلـف تنشـد تواريـخ الأعــراف
تشهـد بنـطـق العـامّـي والفصيـحـه
بوسم العصا نفرق علـى سبـع الأطـواف
سلـمٍ بطـيـب الـعـز ينـفـح نفيـحـه
بأعلـى المكـارم نتسـم سلـم واهــداف
والعـز يقـدح مـن سطـرنـا قديـحـه
(دواسراً) نسقـي العـداء سـم الأتـلاف
علـى العـداء منّـا هـجـاد وصبيـحـه
إليـا تعلوينـا عـلـى كــل مـزغـاف
وعلـى النقـاء واجـه نطيحـن نطيـحـه
فنحورنـا خـيـل المجـاويـخ تـنـلاّف
ولا تنتـداوى مــن طعـنّـا الجريـحـه
(خطلان الأيدي) ممنـة كـل مـن خـاف
فـي ظلنـا عـنـه المـعـادي نزيـحـه
كـم بيرقـن جانـا جموعـه لهـا أرداف
ومـن فعلنـا راحـت اجموعـه طفيحـه
سدنـا وزدنـا بالفخـر عـز واشــراف
وراياتنـا فــي كــل علـيـا مليـحـه
خوينا والجـار فـي فـي ظـل واكنـاف
عـز وفخـر مـا يشتـكـون الجنيـحـه
من سلمنـا مـا يـازا الأجـواد مـزلاف
وقلـب العـدو مالـه عليـنـا فريـحـه
ولا مشيـنـا بالـخـفـا والتـضـعّـاف
وراع الخطـا مــا نرقـبـه يستميـحـه
نضرب علـى العايـل وراع التعجـراف
ضـرب النيـازك بالشـهـاب المويـحـه
من مـال عـال وشـال حملـن بالاكتـاف
ومـن رزحتـه يكثـر رغـاه وفحيـحـه
ومـن لا يحسّـب للعواقـب والاكــلاف
يصبـح وقـا روس النـيـاب الكليـحـه
والحـق لـه سيفـاً سطـيـاً وقـصّـاف
يصطـي علـى صـم العظـام المتيـحـه
هـذا الكـلام اللـي لـه العقـل يكتـاف
عـن طـول مـاروده يكـفّـي مليـحـه
علمـاً (يابـن هـذال) يسمـع وينـشـاف
واذنــك تسمّعـلـه وعيـنـك شبيـحـه
وبعدها أقام الشاعر خلف بن هذال وليمة لثلاثة من شعراء ورواة الدواسر واعتذر فيها عن اخذه سلم الدواسر ولكنه ذكر بأن هناك جماعة من ربعه الحفاة ياسمون العصا وأنه يقصدهم في القصيدة ولكنه جعلها تشمل عتيبة كاملة وهذا ما أخطأ فيه.
مع العلم أن هناك فرق بين وسم العصا بمدة زمنية ومكان معين مثل قوله ( انت في وجهي لين تعدا ذاك الجبل أو ذاك المبدا) وهذا ليس سلم الدواسر ولكنه سلم ( الحنشل)، اما سلم الدواسر فهو بعد ماياسمون عصا الجار فإنه يمشي شرق غرب وشمال جنوب وفي ديار الدواسر ولا يجيه شي.
وقبيلة عتيبة عريقة وغنية عن اخذ سلم لقبيلة أخرى ، كما هو الحال لبقية قبائل الجزيرة العربية.
ويقول راكان بن حثلين بعدما زبنوه آل عمار من الدواسر:
الله من قلب تخالف شطونه= وبقعا تصفق به يمين ويسار
يوم الزعيم البس علينا زبونه= وحمل علينا كن له عندنا ثار
يوم القبايل والدول يتبعونه=نوى يجلينا ورى حد الامصار
لعيون من بالميل يجلي عيونه=انفرق الطابور لو صار ماصار
ذكرت انا اللي جارهم يهملونه 1 =لادزايد سلمهم هملة الجار
نصيت انا اللي مارضولي بالمهونه= نصيت هل السيح لادعمار
جارهم يهملونه: أي يأمنونه بعد ماياسمون عصاه ويبوج الديار وهو وامن.
ويقول الشاعر مسعود بن سعد المقابلة الدوسري:
ونزود في وسمة عصى قصيرنـا=سلـمٍ لنـا علـى الـرجـال يـكـود
ناسـم عصـاه ونهملـه فـي دارنـا=ايليـن يطـلـب ديـرتـه ويـعـود
وترفق مرتنا من ذرابـة سلمنـا=فـي وجـه ابوهـا والسلـوم بنـود
وبيع اللحم عيبٍ علينـا عايـب=والمـاء علينـا بيعتـه منقـود
ولاناكـل الفجـوة ولانقبلـهـا=عـزة نفـوس فـي فعـول اســود
والضيف قـدره عندنـا مثلوثـة=يـوم القـرى علـى الرجـال يكـود
ويقول حسن بن منصور المشاوية الدوسري:
دواســــــــــــــــرٍ لا صار طالب وطلاب=وياسعد منا فــــــــــــي القســــا فزعت لّه
دخيلنا يامـن ولاهـــــوب مرتـــــــــاب=توســـــــــــم عصاه ودارنـــــــــــا مرتعــ له
ويقول الشيخ علي بن محيي آل بلال من مشايخ قبيلة يام :
بني زايد اللي تنطح الضد فـي الميعـاد=دواسر تمكـن فـي عداهـا مضاربهـا
هل العرف واهل السيف والمنسف المعتاد=واهل جيرة ياسم عصا الجار صاحبهـا (1)
لهم هيبة أثقـل مـن العـارض المنقـاد=تحامت على ابن مطرف يـوم لاذ بهـا
بغاه الشريف ولا حصل للشريف مـراد=برزلـه طحاطيـح تفتـل شواربـهـا
تعلوا ظهور الخيل دون الدخيـل عماد=ولهم دولة الاشراف طاحـت مناصبهـا
هذا والقصيدة في عريب الجـدود تعـاد=من اقصى حقيقة كلمـة الحـق نكتبهـا
ابيها الى مـرت علـى واحـد حسـاد=يقنع بهـا نفـس الـردى لـو يغضبهـا
وابيها الى مـرت علـى واحـد جحاد=يعـرف الثنـا ويـرد للنـاس واجبهـا
وابيها الى مرت علـى مجلـس النقـاد=يقولـون مـا فيهـا كـلام يعذربـهـا
والقصائد والسوالف في ذلك كثيرة وانا رأيت الموضوع وكأنه زاد الأخذ فيه والرد فأقول باختصار:
انا اخوكم سعد ربعه وانا دوسري والخويا سبعان ومحب وساكن بديار سبيع الكرام وأنتم وافين وسلومكم من أكبر واجزل سلوم قبايل الجزيرة وكل قبيلة فيها حقها ولها حقها من السلوم التي تفتخر بها حتى تقوم الساعة.
وبالنسبة للاخ ولد المخاريم فأنا الومه في طريقة رده السابقة وانفعالاته اللي مالها سنع ، فهو في محل رجاجيل كرام وقبيلة محترمة والواجب عليه أنه يكون لبق في كلامه حتى يسمع كلامه ويقدرونه الرجال.
مع تحيات: محبكم
سعد ربعه