[أبو مطلق سبيع]

بسم الله الرحمن الرحيم


الحلقة الثالثة

الرد على كتاب سبيع وأصولهم وآل رشود وفروعهم
مؤلفه مبارك بن محمد آل رشود


بقلم محمد مطلق عيد السبيعي

هذه هي الحلقة الثالثة في الرد على كتاب سبيع وأصولهم وقد دعاني لها رد المؤلف علي بنفسه ونشر رده علي في المنتديات فحبيت اني أبين الحق والحقيقة للقراء وانشر المعلومات والتواريخ الموثوقة عن سبيع كافة وارد على الاخطاء والأوهام اللي ما زال المؤلف يكررها مع وضوح الحق له مثل الشمس.. ولا أقبل منه أنه يشكك في حبي لقبيلتي العريقة سبيع فهم هلي وعزوتي وربعي.

ربعي هل الغلبا هل البن والهيل
واهل الشجاعة والنفوس الخفافي

وال رشود ناس عزيزين وكرما ومذكورين بالخير وهم من النبطة اللي قال فيهم الشاعر:
صيت النبيطي بالفخر ماله أشباه طبعه يجي فوق السحب دوم مرقاه
اهل الكرم والسيف لا حل مرعاه نالوا الفخر والعز في كل ميدان

كان ينبغي ان المؤلف يشكرني على ملاحظاتي على كتابه ولكنه هاجمني الله يهديه واتهمني بأني حاقد وحاسد ومغرض وأنا ما يمكن أقابله بمثل كلامه حيث ان اللي ردوا علي من ال رشود ذكروا في كلامهم (انه كبير في السن ولا له اهتمام التاريخ)

والحقيقة أني أدعو مؤرخين سبيع يقرون هذا الكتاب ويقرون حلقاتي الثلاث ويحكمون ويعطوني رأيهم في الكتاب المزور إمتاع السامر المنسوب إلى شعيب الدوسري وانا واحد منكم واخوكم ان كنت مخطي صوبوا خطاي وان كنت على حق فقولوه والمهم تاريخ قبيلة سبيع.

وقد شكرني على الحلقتين الأوله مؤرخنا القدير أبو سعد عبدالله الحضبي وما نستغني عن ملحوظات الباقين مثل الاستاذ سليمان الحديثي وفهيد بن عبدالله السبيعي وابن خثلان..وغيرهم.
وقد ذكر الاستاذ عبدالله الحضبي انه له رد على الكتاب المذكور (سبيع واصولهم وآل رشود وفروعهم) وانا وغيري ننتظر ردك يا استاذ عبدالله وسوف يستفيد منه المؤلف وكل القراء ان شاء الله.



أولاً : هل أنا متحامل على آل رشود

إخواني وأبناء عمومتي ال رشود لا تقسون علي تراني ناصح وانا لن ارد على كلام اللي ردوا علي منكم وتجريحهم فيني وتشكيكهم في شخصيتي
اول شيء بالنسبة لاسلوبي هذا اللي اعطاني الله هذا اسلوبي فيه اخطاء تحملوني يا عزوتي.
اما تشكيك اللي ردوا علي اني ما نيب سبيعي فهذا كلام ما ينرد عليه ابد.
واتهامي من المؤلف في رده علي بأني متحامل وحاسد ومبغض واثير الفتنة والوقيعة بين القبائل اعوذ بالله اعوذ بالله من هذا الاتهام والله يا اخواني ان عظامي ترجف من كلام المؤلف عني وانا اكتب لكم ها الحين
والله اني حليم وما نيب مخلي ابليس يفتن بين وبين بني عمي ابد وراس مالي اني مسامحهم الله يعفوا عني وعنهم لا حول ولا قوة الا بالله وش ذا الهجوم
ما عاد الناس يتحملون الحق ابد

كيف يعدني متحامل يا جماعة هل عشاني رفضت اعتماده على امتاع السامر الكتاب المزور على شعيب الدوسري
قبلي مؤرخين ما ينعدون ردوا على امتاع السامر ماادري ليش متنرفز
يا اخوي يا مبارك اتركك من الانفعال رد على كلامي بمثله المعلومة تنقض اختها مثل انا ما اسوي
لانك وانا اخوك اذا عصبت دروا الناس ان ما عندك رد وهو يمكن عندك
الركادة زينة

والله ان قلبي مليان حب لال رشود ولقبيلتي وحرصي هذا جعلني اكتب واتعب هلكت وراح وقتي وتركت مجالس الوالدة والمؤرخين يقرون كلامي ويعرفون انا حاسد ومبغض والا لا .

انا اتكلم بحقائق واحلل مصادر المؤلف واوعيه وهو يتهمني.
الخطأ مانيب اسكت عليه لا عليكم يا ال رشود ولا منكم
والناس اللي ردوا علي على راسي من فوق قدر ومعزة لكن السكوت على الغلط مشكلة وما نيب ساكت ابد هذا تاريخنا
وادعو اخوي واستاذي عبدالله الحضبي انه يرد علي ان كنت اخطيت في شي وترى صدري يابو سعد وقلبي وسع فياض نجد كلها.

انتم الله يحفظكم ياللي رديتوا تتهربون من الرد علي في الكلام اللي جبت عن امتاع السامر وغيره وتكتبون كلام فيه هجوم علي وهذا واضح اشياء كثيرة في كلامي في الحلقتين تركتوها ما فيه اي تعليق والمؤرخين بينصفوني وينصفونكم وان كاني اخطيت فانا اعتذر

ومن طرفي الله يسامحكم على اللي قلتوه فيني وما في قلبي عليكم شي ابد لكن هذي ردة فعل منكم وبتزول وبتعرفون ولو عقب سنين اني ناصح لكم ولتاريخ القبيلة والنقاش مفيد وجيد وبالعكس هو اللي يطلع التاريخ الصحيح وهذا هو اللي بيعرفه ابناء الجيل الجديد من ال رشود الله يوفقهم جميع او غيرهم.