بعض العرب لامن هرج هرجه اكبار = وليا تكلم قلت وش ذا الوليده
وليا بخصته لينه أنجس من الفار = الحقد في قلبه ونفسه زهيده
يمشي على وجهين بـلسان مكّار = علم(ن) ينقص به والآخر يزيده
عنده علوم اطوال ويدينه اقصار = ويفرح ليا من حصّل اللي يريده
ويصور اللي باقي(ن) مابعد صار = وكثر التَمدّح مالي(ن) به رصيده
الطِيّب راح يمين وهو دربه ايسار = متسلح(ن) بعقال ولّا جريده
وليا كذب له كذبة(ن) مالها عيار = قام ايتخطف مخرج(ن) يستفيده
وسط المجالس عنده لسان ثرثار = يالله عسى الثعبان الأسود يصيده
الطِيب ماله عند الأنذال مقدار = وأهل القلوب الميتات البليده
يالله عسى الأنذال بقصف الأعمار = وأهل النمامه والعلوم النكيده
من شان مايحصل على العالم أضرار = اللي قريِّب دارهم والبعيده
والله يساعد كاسب الطِيب والكار = وأهل النوايا الطيّبات الحميده
اللي تعز الضيف وتقدر الجار = وقت المعاند بالمواقف عنيده
اللي يطبون الخطر وقت الأخطار = أهل العلوم الطيبات المجيده
ترا الردي غدار والوقت غدار = وترا الليالي لينات وشديده
الله يسترنا من الفقر والعار = وأجعل لنا يالله حياة(ن) سعيده
وأستر علينا ياولي وأنت ستَّار = وأجعل وفاة النفس عندك شهيده
والناس صارت تالي الوقت شعَّار = والفرق يطلع في معاني القصيده
وصلاة ربي عدّ همَّال الأمطار = على نبي(ن) نعتقد به عقيده
:::... الشاعـــر ...:::
:::.... مبارك فايز البخيت المحمدي السبيعي ....:::
غير متصل
