منتدى الشعر الشعبي والنبطي ( شعراء الشبكة )قصائد نبطية شعراء قبيلة سبيع الغلباء و الخليج ، دواوين شعرية بالشعر الفصيح و العامي بأجمل الكلمات وأجزل الأبيات
ما هويت ديار ناشية الحضاره = بدوي عشقي وهو ساس الهويه
افهم المعنى على عجل الاشاره = والمراجل مكسبي والنار حيه
في زمان شيخ رجال التجاره = لو مكاسبهم من التحريم نيه
الخداع بسلمهم يعني شطاره = والشطاره عندهم خطوه ذكيه
شيخهم يفرض على السوق احتكاره = الجشع طبعه ورجلينه حفيه
ما ينام الليل ما يهنا بداره = هاجسه مشقيه والنيه دنيه
في زمان قلوا رجال النعاره = في زمان يشقي النفس الرضيه
في زمان يهفي رجال الصداره = في زمان الروس صارت به سويه
في زمان يرفع الناقص شعاره = في زمان البهرجه والعنجهيه
في زمان يكوي العالم بناره = في زمان همل الطرقي خويه
في زمان اهل الردى واهل الحقاره = في زمان اللي محامدهم هفيه
في زمان اهل الفتن تقدح شراره = بالجهر قدام خلق الله عنيه
في زمان سيادته بايدي بكاره = بكرته صارت على دلفه سطيه
في زمان يسلب العارف وقاره = في زمان كلمة العاقل وطيه
في زمان يفقد المعنى اطاره = في زمان يجحد الرجال خيه
في زمان لابشير ولا بشاره = في زمان اهل العلوم المهمهيه
في زمان اهل النفاق اللي ستاره = قول حق ومقتضاه اسوا دعيه
في الزمان اللي تمادى بانحداره = الله يهيي لنا ختمه هنيه
في زمان ينتج عيال الخساره = ما كسبوا لربوعهم كود الرديه
غرس الاول ما جنى طيب ثماره = في زمان ذيل بازمان البريه
الفتى منهم ليا عدا مناره = لكلك لسانه وخطواته بطيه
ساهر ليله ونايم في نهاره = عند عذبات اللمى صاير هريه
يسفهل ليا اجتمع بعيال حاره = ما حسدته صاحب الطله البهيه
بشرته فيها من اللمعه نضاره = ياخذ من اخته طبيعه نرجسيه
وان نصحته ما يعدل من مساره = زاد في غيه عساه يشين غيه
مشيته فيها تبجح مع بطاره = ماخذ مقلب بنفسه واهنيه
في الملاعب بين انواع المهاره = اطرب الجمهور واهدوا له هديه
اعجبه في ملبسه جذب الاثاره = ملبسه وردي عسى داره نحيه
كشخته يختارها له مستشاره = عل شكله ينقطع يا اهل الحميه
جبت وصف فيه مضمون العباره = من عنى فكري وخطنه يديه
أخي فارس العشر صح لسانك وسلمت يمناك قصيدة رااائعه
من شاعر رائع ومبدع ولكن ياخي فارس الزمان ما زال به من
الرجال الاوفيا شرواك الكثير إن شا الله لاهنت وتقبل تحياتي
اشكرك على مرورك يالحميدي السبيعي وكلامك صحيح لكن مجتمعنا اليوم لايخلوا من الاصناف اللي انا ذكرتهم
ووصفتهم في قصيدتي وللمعلوميه انا غير متشائم واللي ذكرتهم يمثلون شريحه كبيره من مجتمعاتنا اليوم
وفي النهايه اقول لك ما عليك زود
واكرر شكري واحترامي لشخصك ووجهة نظرك
غير متصل
