أشرف المدح اللي مايكون هدفه المصلحه .. أو اللي يقال عن تجربه ويكون من باب (هل جزاء الإحسان إلا الإحسان)
أذكر إني مدحت مره واحد يستاهل .. وختمت القصيده بالأبيات هذي
أقولها و أنا ما أحب التهاويل = أقول في اللي يستحق المقالي
ليا مدحت الطيبين المشاكيل = شهودهم قبل الكلام الفعالي
مغير أسجل طيبهم بالتماثيل = مثايل مابعتها بالريالي
أمثال أكرّمها عن القال والقيل = مابي لها مكسب و لا رأس مالي
و قاسي بن فهيد الرويبي السبيعي .. أخو عزيز .. وصاحب من الطراز النادر
ماهيب مجامله .. لكن من واقع تجربه
كثر الله خير من ناشني خيره = لحقني خيره وهو مالحق خيري
صاحب في الناس ماله مثل غيره = وإلا أنا في الناس مثلي مثل غيري
إنتبه لي طيب الأصل والسيره = قبل لا أبدي له علومي وأخابيري
وقام من كيفه برايه وتدبيره = وإحتزم لي بالجهد والدنانيري
لين حرر لازم صعب تحريره = قزره في قطعة أيام تقزيري
لوسكت عني فأنا عنه في حيره =قافل من دون شكواي أزاريري
ولوتعذر كان مالاحقه عيره = ياسع أقرب منه باب المعاذيري
مير ساقه دافع الطيب والغيره = يأخذه للطيب مثل السعاطيري
فزعة في وقتها جت على سيره = جت على الميعاد من غير تأخيري
لاهيب الأولى ولاهيب الأخيره = مثبتين غيرها بالتقاريري
قاسي بن فهيد ماله مثل غيره = غير في بعض القصص والأساطيري