جناب حضرة سعادة ( عبد العال ) بقلم :محمد سنجر

[محمد سنجر]

أما أنا برضه حكايتي حكاية
اسمعوا برضه حكايتي و شوفوا معايا

جاني في يوم الواد كباية
و معاه حامد و ابن ستيته و عبد العاطي
قالوا ها نعمل مع بعضينا فريق لا يأنن و لا بيطاطي

ولما بدأنا يدوبك نلعب
جبنا جونين من نص الملعب
قلنا خلاص البلية ها تلعب

فجأة لقينا الحكم الأصلي في لحظة اتشال
أيوه اتبدل جابوا مكانه عبد العال
أه لو شفتم عبدالعال

عبد العال حاجة عملاقة مش انسان
رد سجون وحش و حيوان
كمان مجنون أكل المساجين
و حلا وراهم بالسجان

نزل الباشا عبد العال اترج الملعب
قلت في نفسى عال العال
قال : أنا هالعب

قلت بكل براءة و ذوق و على استحياء
: هو جناب حضرتكم برضه مش ها تحكم ؟

فجأة لقيت الكف ده نازل واخد وشي عند قفايا
قال : اياكم حد يهزر مرة معايا

آه لو دقتم يوم
كف سعادة حضرة عبد العال

قال : أنا واد فركيكو و جامد و شادد حيله
ألعب و أتحكم و اتفرج
و اللي يحاول فيكو يفلفص يبقى ياويله

حسب الباشا علينا بنالتي قلنا و ماله
شاط الكورة جت فينا جون هللناله و فرحناله

و لما غلطت و خدت الكورة أباصي لحامد
راح الباشا اتنرفز جدا عصب جامد

لقينا الضرب بدون أسباب علينا انهال
ما ادري منين
بونية يمين و رفسة شمال

و لما جرينا عشان ما نموتش في ايده فطيس
رحنا قوام على أقرب قسم بوليس

و لما دخلنا عند الظابط نشكي الحال
لقينا الظابط هو بشحمه ولحمه عبد العال

و لما حاولت اهرب و اتراجع عن شكوايا
لقيت من عبد العال كذا نسخه عند قفايا

قلت في نفسي احلوت و بقت عال العال

آه لو دقتم يوم كف سعادة حضرة عبد العال

[محمد سنجر]

جوه الملعب
أنا بتكلم أهو وبأكد
إني كلامي
عن أحوالي
جوه الملعب
مش براه
لأ جواه
إوعى يا عبد العاطي يا خويا
إوعى في يوم يجي حد يقولك تقصد إيه
إوعى يجيلك عبد العال
و تلاقي شرار باين في عينيه
يجي يقولك
حكايتك إيه بالظبط معايا
تقصد إيه بالواد كوباية
إوعى تقوله عن فرقتنا
إوعى تقوله حاجة يا عاطي عن خطتنا
مين الجون
مين ها يدافع و الا هجوم
و مدربنا من البرازيل
و الا سوداني من الخرطوم
إوعى يا خويا يا عبد العاطي
اوعى تطاطي
و لو ضربوك
اوعى تطاطي
خليك راجل زي أبوك
إوعى تطاطي
و لو ماقدرتش تمسك نفسك
و ناوي يا عبد العاطي تطاطي

لو ها تطاطي
يا عبد العاطي
لأنك واطي
إوعى تعلم ابنك
برضه يطاطي
إوعى تعلم ابنك
برضه يطاطي
إوعى تعلم ابنك
برضه يطاطي

[محمد سنجر]

في يوم بالليل كده قبل الفجر
في عز البرد
و أنا سهران قدام لابتوبي
و حاطط إيدي ع الكي بورد
لقيت الباب بيخبط جامد
قلت أكيد الواد كباية و عبد العاطي
و ابن ستيتة و معاه حامد
قمت قوام و بسرعة و ها افتح
خير اللهم اجعله خير
فجأة لقيت الأوضة بتاعتي من غير باب
لأ و لقيت من عبد العال
واحد أتنين ؟ لأ ده كتير
قلت احلوت خالص ، ليلتي هباب
بصراحة يا جماعة الناس عاملوني
بالاتيكيت و بدون أسباب
أيوه مهانش عليهم أنزل ماشي
لأ ، رجليا بالشكل ده
تتعك تراب
قاموا شايليني كده هيلا بيلا
لفت بيا الدنيا و دخت
و عقلى ده غاب

فقت لقيتني كأني في حلم
لقيت قدامي
ما لذ و طاب
طحينة و طرشي و بيبسي كمان
و صحن كباب
قالي : جعان ؟
قلت : أنا واقع ميت
قال : طب ايه بقى رأي سيادتك
إني أمينة و دول أولادك
و أنت الليلة هنا سي السيد
لقيته قوام حبش لي رغيف
قالي اتفضل يالا و كل
إنت زبونا الليلة يا ريس
و أنا هابقالك عبده الشيف
و لما أخدته و لسه يدوبك
ها اقطم أول قطمة كباب
لقيت فيه بونية
جوه عينيا
لقيت شبورة و دوخة
و الدنيا ضباب
زعق فيا بصوته العالي
فاكر انك ممكن تهرب
تروح أمريكا و الا تشيلي
و الا الصين أو حتى المغرب
قاعد بتلسن على مين
يا ابن ( # # # # # # # )
قول كده بسكات
قاعد بتقطع فروتنا ليه ع النت
لأ و كمان ف المنتديات
قلت له لأ و المصحف
أعدم عيني
هو أنا كان فيه حاجة لا مؤاخذة
بينكو و بيني
دانا لما باجيلكم يا جماعة
بتبقم بيا لفوق طايرين
و لا بتخلوني كده اريحلي و لو ساعتين
على طول ترحيبكم شغال
شوية يمين و حبة شمال
قالي سعادة الباشا : جميل
و كلامك فل و عال العال
أمال بقى تقصد مين بعبد العال ؟
قلتله : كده كلمه في سرك
أصل حيطانا ليها ودان
أيوة تعالى و قرب ودنك
أقصد بوش
و فتوات العالم كله
الأمريكان
قالي : طب احلف
قلت له و حياة رحمة ستك
لو مش واثق في كلامي
أحلف على المصحف

فجأة لقيته خلع الوش
كان لابس أيوه قناع
كان بيغش

أيوه قناع م اللي بينباع
و بان الوش
بان الوش
بان الوش

وش بقاله سنين و سنين
حزروا فزروا يطلع مين ؟

[راقي المعالي]

رائع يا راااائع

تحياتي

[ابن جعوان]

حلو جدا اشكرك
تقبل مروري لاهنت

[محمد سنجر]

المشاركة الأصلية كتبت بواسطة راقي المعالي

رائع يا راااائع

تحياتي

جزاكم الله خيرا
رائع المعاني
دمت بحفظ الرحمن

[محمد سنجر]

المشاركة الأصلية كتبت بواسطة ابن جعوان

حلو جدا اشكرك
تقبل مروري لاهنت

جزاكم الله عني خيرا
أخي العزيز
ابن جعوان
دمت بحفظ الرحمن