عاجل إلى الملك عبدالله بخصوص كارثة الأسهم ( بالرسم والصوت )

[بدر محمدالسبيعي]

السلام عليكم ورحمة الله وبركاته

هي لقلوبكم الطاهره 000 أتمنى أن ترتقي لذائقتكم يالغالين



للتحميل والحفظ اضغط على الرابط بالأسفل بزر الماوس الأيمن ثم حفظ باسم :

http://www.bh2day.net/medialoader/midi2/ashaaaam.rm

ياليت عندي في رصيدي ملايين=وادخل بها في سوق الاسهم علاشان
ارفع بها الشركات وانقذ مساكين=تعلقوا تعليقتن شانها شان
طبوا وهم صاحين وامسوا مجانين=يمشون بالشارع ومن غير حذيان
توهقوا توهيقتن فالها شين=وبعض الهقاوي تجعل الشخص عميان
خسروا 00وروس اموالهم كلها دين=مدبولتن تدبيل من عند ديان
والبيت مليان ٍ حريم ووراعين=مصروفهم يقطع قويات الامتان
صاروا من صدوف الليالي حزينين=لاوالله الا 00 روحوا في خبر كان
راحوا ضحايا في يدين الخبيثين=شلة هوامير ٍ تلاعب بالاذهان
تنهب دراهم شعب مثل الشياطين=وترفع سهم شركه ولو كان خسران
لكن انا بنخى زعيم السلاطين=بو متعب اللي للصعيبات مزبان
وانخى ولي العهد سقم المعادين=عضيد ابو متعب ويمناه سلطان
ملوكنا نفخر بهم فالميادين=اهل الوفا وافعالهم خير برهان
إلكم ولا 00 والكم غلا 00 يالعزيزين=غلا حقيقي مايجي فيه نقصان
تبصروا في سوقنا يالميامين=لابد يرجع سوقنا زي ماكان
لاهان ابو متعب زعيم الشجيعين=صقر العروبه للشكالات عنوان
اللي مشى حبه بوسط الشرايين=محزم ظهر شعبه على كل الازمان
له فزعتن تشهد بها الهند والصين=غيث ٍ على كل المناطق والاوطان
تكفا يابو متعب ترانا مصابين=افزع لنا يامسندي ياكحيلان
من سوق الاسهم صابنا الهم والبين=والقلب من شغل الهوامير مرضان
احمرت الشركات واحمرت العين=امن النظر في شاشة ٍ كلها احزان
سوقك يابو متعب يبي دعمك الحين=عوايدك فعل المكارم والاحسان

وسلامة الجميع

[ماضي المديري]

بيض الله وجهك
يابو محمد

قصيده جزله وافيه


الله يرفع السوق مانبي الا نصف راس المال


الله يعوضنا

تقبل تحياتي يابو محمد

[أبو يزيد]

صح لسانك

وسلم بننانك وعساك على القوه

رائعه

بروعة حضورك قصيده معبره عن هموم المواطن وصوت جميل
وأداء رائع لاهنت يابدر.

وابشر بالخير فى عهد ملك القلوب.

سلمت ودمت,,,,

[عايش ابوليل]

ابو محمد اقول كفيت ووفيت وبيض الله وجهك

قصيده أجتماعيه وتحكي معاناة حقيقيه

لكن مانبى الا رآس المال على ماقال اخوي عقيد القوم


تقبل تحيااتي ومروري المتواضع

[فـــالح السبيعي]

صح لسانك وبيض الله وجهك
قصيده رائعه كروعة شاعرها سجلنا إعجابنا بها وفخرنا بك
مشكور يابومحمد

[الحميدي السويدي]

صح لسان يا ابو محمد وابو متعب
قدها وقدودها وحسبنا الله على
اللي كان السبب في ذلك,,,,,,

[بدر محمدالسبيعي]

عقيد القوم


صح بدنك يالغالي


مرورك شرف ولاهنت

[بدر محمدالسبيعي]

المشاركة الأصلية كتبت بواسطة أبو يزيد

صح لسانك

وسلم بننانك وعساك على القوه

رائعه

بروعة حضورك قصيده معبره عن هموم المواطن وصوت جميل
وأداء رائع لاهنت يابدر.

وابشر بالخير فى عهد ملك القلوب.

سلمت ودمت,,,,

الغالي ابو يزيد

صح بدنك ولاهنت على مرورك يالقرم


تحيتي وتقديري

بدر السبيعي

[بدر محمدالسبيعي]

الغالي عايش ابو ليل

صح بدنك يالقرم ولاهنت على مرورك

تحيتي لشخصك الكريم

كن بخير يالغالي

[محمد بن كسران]

ابو محمد
بيض الله وجهك
قصيدة رائعه
من شاعر اروع
والله اني تمنيت اني شاعر وان القصيدة هذي لي
وان شاء الله ان السوق يرتفع
تقبل مروري
اخوك / محمد بن كسران
تحياتي ,,,,,,