أستبيحكم العذر ( لذكر موقف حصل لي مع بنت من بنات احدى المنتديات) ؟؟؟

[الصيدلي]

أستبيحكم العذر

( لذكر موقف حصل لي مع بنت من بنات احدى المنتديات)



لاحظت في فترة من الفترات أن فيه عضوة من أعضاء المنتدى اللي أنا فيه مركزة على مواضيعي وترد عليها.. وكانت ردودها ردود إعجاب شديد... لدرجة إنها صارت تدور مواضيعي كلها وترد عليها... حتى لو كانت قديمة.....

أنا جاني الغرور وبديت أشوف نفسي... إيه من قدي صار لي معجبات...
صرت أجلس على الإنترنت أكثر من جلستي مع أي شخص ثاني...

حتى إذا طلعت مع أخوياي ماأطول معهم وعلى طول أرجع للبيت وأجلس على الأنترنت وأبدأ بالأفكار والكتابة والتأليف كل هذا عشان المعجبين مايفقدون حسي في المنتدى....
يعني الغرور كان واصل حده عندي...

وفي يوم من الأيام كنت طالع للمقهى مع أخوياي وذاك اليوم كعادتي في الفترة الأخيرة مااطول معهم رجعت ذيك الليلة بدري يعني حوالي الساعة 12 بالليل...( حنا يالشباب الفاضي 12بالليل . يعتبر أول الليل عندنا )...

المهم وأنا راجع وقاعد أسولف مع نفسي وأغني وأهيجن وموسع الصدر على الآخر...
ويوم دخلت شارع حارتنا الرئيسي..وكان كالعادة في مثل هالأوقات فاضي تقريبا....
وفجأة...
لقيت وحده لحالها بالشارع وتأشر...
أنا حسبتها تأشر لليموزين وراي ... بس يوم طالعت مع المراية ماوراي سيارات...
قلت في نفسي ... وش عندها ذي...ووش قصتها.....
خلني أخذ فرة ثانيه بالشارع وأشوف وش السالفة...

خذت لي فرة وفرتين وثلاث.... وكانت كل مامرت سيارة أشرت لها... ومحد يوقف لها...

أنا قلت أبوقف لها.. بس خفت تكون رجال من ذا اللي يقطعون الطريق ويكون لابس عباية يعني مسوي تمويه ولا شي....

قلت أبجهز العجرا وامسكها بيدي وأوقف وأن شفت شي مريب نزلت عليه وجلدته بذا العجرا....

وفعلا وقفت....

قلت : نعم وش عندك تأشرين؟..

قالت: لو سمحت يااخوي أبيك توصلني للبيت....

أنا : ومتى المعرفة عشان أوصلك لبيتكم..

هي : أجل وشوله واقف لي....

أنا : أنا واقف أبشوف وش سالفتك... يعني بنت تالي الليل وفي شارع فاضي .. وش القصة..؟..

هي : ومو معنى هالشي إني أكون من اللي في بالك... أنا كنت راكبة مع ليموزين.. وبدأ يتحرش فيني وأنا بديت أزاعق واصارخ وهو خاف ووقفني هنا....

أنا : لاحوووووول ولاقوة إلا بالله... طيب طيب ...بيتكم وينه فيه؟....

هي : قريب ...يعني تقريبا ثلاث كيلوات من هنا....

أنا : طيب .. يالله أركبي خل نوصلك نكسب فيك أجر....


جت تبي تركب ورا وقلت لها : لا تعالي قداااام ... رفضت ..... قلت لها : ركوبك ورا يجيب لي الشبهة تعالي قدااام ومايكون إلا كل خير...

وفعلا ركبت قداام.... وأول ماركبت ..

قلت : إسمعي يابنت الناس... أنا مابعد تأكدت أنك بنت.. أنا اخاف أنك من قطاعين الطرق واللي يتقنون أصوات الحريم.. وعشان كذا ماخليتك تركبين ورا... أخاف وأنا أسوق تجيني من ورا غدر وتسوي فيني شي...

ردت علي وقالت : والله بنت ... وماني من ذا اللي تقول عنهم...صدقني..

قلت : إكشفي لي وجهك..

قالت: ( وبسرعة) مستحيل...

قلت : أجل إنزلي...

قالت: تكفى ياخوي أنا ماصدقت اني القى أحد يوصلني أرجوك لاتخليني في ذا الشارع المظلم لحالي...

قلت : أن لازم أتأكد أنك بنت..

قالت : والله بنت.. وأرجوك لاتستغل الموقف...

قلت : هذا حقي ... انا ماقلت أبسوي معك شي حرااام لاقدر الله.... أنا أبي أريح نفسي بس....

قالت: أنا وكلت رب العالمين في أمري....

وكشفت نصف وجهها.. وشفت دموع تسيل من عينها....

أستغربت... بس جمعت قواي وسحبت لثامها كله... وشفت شي عجيب.....

شفت وجهها ..... شفت الحسن كله....شفت الجمال... سبحان الله صورها....وشفت دموع تسيل على خدها..... كانت تبكي بدون صوت... حتى مارفعت عينها بعيني......

غطيت وجهها وصديت.. ومسكت طريقي ومشيت فيه....

كان تفكيري يلعب فيني شمال ويمين...
هي وش طلعها من ليموزين تالي الليل..وش سالفتها... ياولد لاتكون من بنات الليل ....وقاعدة تمثل عليك....أطلع بها ... اطلع بها محد داري عنك....
وبدأ إبليس يشاركني تفكيري....

بس كنت كلما تذكرت كلمتها ( وكلت رب العاملين في أمري ).... وكل ماتذكرت دموعها... أستغفر الله وأرجع عن الأفكار السوداء....

وبعد وقت قصير وصلتها لبيتهم ... ونزلت بسرعة أختفت ورا الجدران... وأنا قاعد أتابعها...وأفكر في هالبنت العجيبة... ووش قصتها ....

ومادريت إلا وأبوها ينزلني من السيارة غصب ... ويجلد فيني جلد... ومافكني منه إلا البنت...يوم حلفت له إني مالمستها بشر.....

الأب وقف وهو مازال ماسكني ... وطالعني وقال : تنام هنا... وبكرة نروح للمستشفى ونتأكد من كل شي...فااهم..

وافقت مضطر يعني واحد في نفس موقفي وش يبي يسوي...

وأتصلت على أهلى وقلت لهم إني أبنام عند صديقي محمد اللي ساكن لحاله لأنه مريض وابغى أشوف طلباته....

والله ويدخلني أبوها للمجلس..ويقفل علي الباب....

نمت عندهم وأنا عيوني مفتوحة...أفكر في هالورطة اللي ورطت نفسي فيها بدون داعي....البنت أنا وش دخلني فيها أروح أوصلها كان خليتها ويرزقها رب العالمين من يوصلها...

كنت خايف ويزداد خوفي إذا سمعت خطوات أبوها وهو قاعد يمشي عند الباب رايح جاي......

وأصبح الصبح...وقبل كل شي... نقزنا للمستشفى...وسوينا التحاليل للبنت والفحوصات وكل شي...
والحمد لله طلعت البنت شريفة وأنها مازالت بكر... هالشي خلاني أشيل فكرة أنها من بنات الليل نهائيا عن بالي....

وحنا طالعين من المستشفى ...

قال لي أبوها.. ياوليدي أنا اسف ... بس العذر والسموحة يعني واحد موقفه مثل موقفي ...يعني يطلع للحوش الساعه 1 الفجر ويلقى بنته تدخل عليه البيت... وواحد غريب هو اللي موصلها.. وش تبغا يكون تصرفي غير هذا....

قلت : ياعم .. أنا ماشرهت عليك... ومن حقك كل اللي سويته.. وتتطمن على بنتكم المصون...

قال : ياوليدي أنا أبسألك سؤال؟.

قلت : تفضل .

قال : أنت متزوج؟؟..

قلت : خلني أخلص دارستي واتوظف وبعدين أفكر بالزاوج..يا عم أنت عارف أن هالزمن صعب...

قال : الله يستر عليك زي ماسترت على بنتي... ويوفقك لبنت الحلال اللي تسعدك انشاء الله....

قلت : اللهم أمين... أنا أبمشي اللحين توصيني على شي..

قال : سلامتك ياوليدي والله يحفظك.... وانا اسف مرة ثانية...

تركتهم ومشيت.... ورجعت لبيتنا...
والخوف و الروعة مازالت في قمتها..لدرجة أني ماطلعت من البيت أسبوع... إلا ما طلعت حتى من غرفتي....

وبعد هالأسبوع بديت على شوي شوي أطلع على خفيف.. ورجعت للأنترنت مرة ثانيه ..وتذكرت المعجبين.... إيه اللي يدورون مواضيعي.... واروح أشوف وش صار على المنتدى وعلى مواضيعي.... ويوم دخلت المنتدى ...لقيت موجود رساله خاصة.... قلت أشوف منهي منه...

لقيتها من العضوة اللي دايم ترد على مواضيعي بأعجاب... وكانت تطلب في الرسالة... أن عندها قصة وتبغاني أكتبها بأسلوبي لأنه زي ماتقول معجبها الأسلوب...

أنا ارسلت لها وقلت هاتي القصه ونشوف وش نقدر نسوي....

المهم رجعت للمنتدى وقعدت أتصفحه ... كنت مشتاق له حيل....

وبعد نص ساعه لقيت .... انه يوجد عندي رساله خاصة توها تجي .... فتحت الرسالة.. ولقيتها من نفس العضوة.. وترد على رسالتي.... وكاتبة القصة... قعدت أقرأ بطريقة الكبار يعني أدقق عند كل حرف واوقف عند كل كلمة...

بس...... هذي هي نفس قصتي.... إيه قصتي مع البنت اللي لقيتها بالشارع....

وش الكلام هذا.....

وشلون.... معقوله تكون هي نفسها البنت..... لالا ما أظن.. إذا أنا وأنا رجال... قعدت منهار أسبوع كامل... وشلون حالتها هي....

فكرت كثير .. وقررت إني أعرف منهي ذا العضوة...

ارسلت لها وطلبت انها تسوي اضافه بالماسنجر عندها عشان أناقشها على القصة...

وفعلا بعد يومين لقيت إضافه بالماسنجر..

((@HOTMAIL.COM------ ) .... عبق الزهور يرغب بالتحدث إليك)....

قبلت الإضافة.... وجلست أنتظرها... وفعلا بعد ثلاث ساعات لقيتها داخلة الماسنجر...ودار بيننا الحوار التالي:

سلطان says:
السلام عليكم...

عبق الزهور says:
وعليكم السلام

سلطان says:
يالله حيها ... كيف الحال ... وش الأخبار.. بشرينا عنك...

عبق الزهور says:
بخير..

عبق الزهورsays:
ممكن تقولي إيش سويت بالقصة لو سمحت؟؟..

سلطان says:
أنا ودي أسألك سؤال إذا ممكن؟..

عبق الزهور says:
بس أنت ماجاوبت على سؤالي؟؟...

سلطان says:
القصة غريبة شوي... وما أتوقع انها ممكن تكون حقيقية زي ماقلتي لي بالرسالة الخاصة..

عبق الزهور says:
لأ... لا والله حقيقية وصايرة مع صديقتي...

سلطان says:
صديقتك...؟؟؟... ممكن أعرف أسمها ؟؟...

عبق الزهور says:
نعم؟؟... أنت وش خصك بالإسم ... صحيح إنك تجيد فن القصص بس الأسماء مالها علاقة بالموضوع...

سلطان says:
أنتي تعرفين اللي وصلها لبيتهم من يكون....

عبق الزهور says:
لأ.. طبعا لأنه وصل صديقتي ماوصلني أنا و مو من طبعي الإلحاح مثل الغير...

سلطان says:
عموما أنا أبقولك من اللي وصلها... مادام أنا اجيد فن القصص... ترا أنا أجيد فن التوقعات..

عبق الزهور says:
طيب خل نشوف يابديع زمانك.. من هو..

saysسلطان :
أنا..

عبق الزهور says:
؟؟؟؟؟ إيش تقصد ؟؟؟؟ ...

سلطان says:
أنا اللي وصلتها... وعندي الدليل...

عبق الزهور says:
الدليل ؟؟؟..

سلطان says:
إيه الدليل اللي يثبت أنه أنا نفس الشخص... أنا مستعد أذكر لك أشياء... صارت في نفس الليلة ومااحد غريب ممكن يعرفها غير نفس الشخص اللي وصلها...

عبق الزهور says:
مثل؟؟؟؟؟..

سلطان says:
وش كانت شنطتها ووصف ووجهها ... ولون ثوبها..... ووأوصف لك أبوها بعد لوتبين..

عبق الزهور says:
طيب يالله قول أوصف خلني اشوف...

saysسلطان :
أنتي وش يهمك طيب؟...

عبق الزهور says:
أنت اللي طلبت مو أنا؟؟؟...

سلطان says:
إيه صح ....


وبديت أوصف لها كل شي ... واثبت لها اني أنا نفس الشخص اللي وصل صديقتها...

عبق الزهور says:
فعلا أنت صادق بكل اللي قلته...

سلطان says:
شفتي أنه أنا نفس الشخص اللي وصل صديقتك...

عبق الزهور says:
أنت تدري مين البنت؟؟؟...

سلطان says:
كل اللي أعرفه انها صديقتك...

عبق الزهور says:
أنا... هي نفس البنت...

سلطان says:
معقولة؟؟؟؟....

( تعذر تسليم الرسالة لكافة المستخدمين
saysسلطان :
معقولة؟؟؟؟؟؟.)

وانتهت ذيك المحادثة وأنا ماخذت جواب شافي... وكنت مستغرب كيف الأقدار تجمع بيننا بعد ماظنيت أني خلاص أنتهيت من سالفتها...

قررت أني أجلس لها واقعد أنتظرها في كل الأوقات لين ألقاها....

وجاء يوم ودخلت وكلمتها.... وسألتها


سلطان says:
ممكن سؤال ؟

عبق الزهور says:
تفضل...

سلطان says:
أنا أبغى أفهم أنتي وش طلعك ذيك الليلة وخلاك تركبين مع ليموزين ... انا ترا من ذيك الأيام وأنا أفكر في هالشيء....

عبق الزهور says:
إسمع سلطان .. أنا أمنتك على نفسي وركبت معك توصلني...وأظن لو قلت لك على سري ماراح تتكلم عني فيه عند الناس.. وخصوصا... إنك حتى البيت تعرفه..

سلطان says:
وأنا انشاء الله أبكون عند حسن ظنك...

عبق الزهور says:
أنا كنت عند نايمة عند خالتي ...لأنه بنت خالتي في نفس عمري.... وفي الليل سمعت زوج خالتي قاعد يصارخ على خالتي... وبدأ يتكلم كلام جرحني... يقول أننا ماتحملنا بناتنا عشان نتحمل بنات العالم... ومن هذا الكلام اللي يجرح....وخالتي مسكينه تحاول تسكته وهو يصارخ بصوت أعلى ...

أنا ماقدرت اتحمل أني قاعدة في بيته وهو مايبغاني أجلس فيه... حسيت إني أنجرحت بكلامه.. ومالقيت نفسي إلا برا البيت...

سلطان says:
إيه بس انتي بنت ومايصير تطلعين لحالك في وقت متأخر....

عبق الزهور says:
وقتها ماقدرت أفكر... لاتلومني... حس فيني الله يخليك...

سلطان says:
انا ماأدري وش أقولك بس الأيام راح تبين لك هل اللي سويتيه صح ولا خطأ...

**************
*********

أخيرا عرفت السبب اللي خلاها تطلع تالي الليل.. وكان بالنسبة لي كافي ومقنع ماادري ليش....

ومع مرور الأيام بديت أحس بقرب لها..... وبديت احس انها لي .... وبديت أحس أن رب العالمين أرسلها لي ذيك الليلة... ووخلاها بطريقي عشان أعرفها... وتكون من نصيبي...

وصارحتها بهالشي.... وكان عندها نفس الإحساس والشعور...

وعشنا مع بعض ايام كلها حب وسعادة... وماكن ينغص علينا شي أبد ... أصلا ماكنا نسمح لشي يخرب علينا جونا اللي معيشين نفسنا فيه....

ولكن.. كان القدر اقوى مننا...
ومارست الأيام جبروتها علينا.....

وفرقت بيننا.. إيه فرقت .... تقدم لخطبتها شاب من هالشباب... هي ماكانت تبغاه..بس ابوها كان خايف عليها لأن العمر يمشي وهي مابعد تزوجت...

وفعلا تزوجت بعدها بشهور... وانا متضايق ومقهوور....

بس جاء الخبر اللي أسعدني وضايقني بنفس الوقت.....


وعلى طول وبعد ماانتهت عدة لأربعة شهور عشرة ايام .. تقدمت لها وطلبتها ووافقوا.... وعشنا حياتنا من جديد حياة سعيدة بديناها حب وأنتهت قصة الحب بزاوج... وخالفنا القاعدة... وأثبتنا للكل أنه ممكن للحب ان يعيش إذا خالط الحب صدق...


القصه لم تحصل لي شخصيا وانما الشخص مغاير لصيدلي ..


سبحان الله والله شي جدا غريب00

حبيت انقلكم الموقف 00

لانه اول مره في حياتي تصادفني موقف هكذا مثلها00

وتلاحظون فيها لعبه القدر سبحان

بغض النظر عن زواجهما ،، او عن مصداقية الحدث..

بل

لكن

السؤال المطروح :

[MARQUEE=RIGHT]هل تعتقد بأنها اتخذت القرار السليم للخروج من البيت في الليل المظلم ؟[/MARQUEE]
شاكر لكم علي اطلاعكم علي ماقيد في الاعلى...


************

[][ زل الطرب ][]

يسعد مسأك ياللي المساء ماهو مساء الا معاك


بصراحه أسلوبك رووووووووووووووووعه ويأخذ العقل


وباللهي عليك سجلني من المعجبين لك يا ذوق

















بس للأسف ما أطلع في الليل ههههههههههههههههههه




















وبالنسبه لتصرفها في الخروج بالليل غلط حتى لو وجه لها الكلام مباشرتاً








وأكرر أعجابي الشديد لك



أخوك/ زل الطرب

[مشعاب]

هههههههههههههههههههههههههه

الصيدلي = قصص حريم + حكايات حريم


اسمع يقول وركبتها قدام وقلت لازم اشوف وجهك وخلتني اشوفه وشفت عيونها وبعد يقول شريفه امحق شرف

ونوموني عندهم وكشفوا عليها وأنا معهم



تركي ما عندك سوالف زينه تناسب عيونا وافهامنا



بس لا تزعل ترى اخوك يحب المزوح:D

[السبيعي الغازي]

وفعلا خروجها غير منطقي مهما كانت الأسباب .
وللعموم وهو رأياً شخصياً : المفروض البنت لا تمكن من الانترنت
ولا أحجر واسعاً ولكن عالم الانترنت محفوفاً بالمخاطر مهما كانت درجة وعي الفتاة
والأخذ بالحكمة ( ابعد عن الشر وغني له )[مع التحفظ على غني له] أفضل مع الفتيات
شاكر ومقدر مشاركتك

[اخو شما]

تحيه طيبه وبعد
نسأل الله سبحانه ان يصون اعراض المسلمين
هذه الفتاه ارتكبت من المحظورات والمغالطات الشي الكثير
هي في البدايه سمحت لنفسها بأن تتداخل مع الرجال وتبدي
الاعجاب بما يكتبون وهم ايضا يبادلونها نفس الاعجاب والله المستعان
ثم خروجها لوحدها وركوبها مع الغريب الاجنبي لوحدها وكشف ماحرم الله
ياأخي الكريم تركي:
يجب ان لا نغلف الاخطاء بغلاف الرومانسيه والطهر والعفويه
ابدا فالحرام ليس له مبرر
والطريق واضح والدين كالمحجةا لبيضاء لايزيغ عنها الا هالك
ارجع ايها الكريم لموضوعك السابق عن كتابة المرأه في المنتديات والانترنت
وستجد ان القصه لاتخرج من رحم صلب الموضوع وبالعكس تماما يمكن ان
نسوق القصه كشاهد اثبات على سلبية مشاركة المرأه في النت
شكرا لك ايها الفاضل
ودمت على خير
اخو شما

[الصيدلي]

][ زل الطرب ][

:)

الصيدلي يشكرك لدخولك معه في مداخله في احدى مواضيعه .
ولعلك تستفيد من الموقف بعدم النوم لدى من لايرغب بك في بيته لكي لا تضطر بالخروج من البيت ليلا..


اخوك الصيدلي

:)

[الصيدلي]

*******

مشعان : (مزوح)
(اوردها مشعان ومشعان مرتجل ماهكذا يامشعان تورد الابل )


اخي الفاضل :

لو انك تمعنت في اخر الموضوع لعلمت علما قاطعا ،، بأن الصيدلي لم يكن طرفا بهذة القضيه ،، وانه قيد في اخر تعليق له ،، بأن الموضوع ليس علي مصداقية حدوث الموقف لكن القضية تدور حول ( السؤال المطروح).

وفي الاخير :

أحببت بأن اخبرك أن معادلت مشعان:
(الصيدلي = قصص حريم + حكايات حريم) ،، بأنها ليست صحيحه وارجو ان يكون ارقي في ردودة القادمه لكي يتعلم من أخطائه.

اشكرك اخوي مزوح علي تعليقك.

:)

[ابن جـــــــراح]

الصيدلي

التعليق نفس تعليقي في مشاركة البنات في الانتر نت



لكن قصه ما عليش ما اعتقد انها واقعيه نهائيا

هالحين الواحد تدري انه يدخل الانتر نت لو تبيه بموضوع ما رد عليك ولا بعد يومين

وهذا على طول طاح في البنت اعتقد هذا لو يفتح محل كان يطلع مليار دير بيومين

لان حظه يكسر الصخر بالله قل للرجال بفتح مشروع وتراه شريكي في النصف ابي اسمه بس

تقبل خالص تحيات اخوك بن جراح

[الغــريــب]

اخوي الصيدلي

سالفة انها تطلع هذي يبيلها حش رجلين

اما قصة الحب قطعت قلبي

وكسرت خاطري

اهم شي هم ماسوو حادث وهم راجعين