منحنى جبري
محاوره بين الشاعرين جبار مقعد بن جبر السبيعي ومحمد مبارك الردعان الرشيدي
جبار السبيعي:
سلام والتاريخ يرضي الكل حزات الوجوب=يرجع له الميلاد والهجري يامكفي البلا
يامحمد الردعان وين اللي يعدلون الدروب=الدرب يشبه منحنى جبري يامكفي البلا
محمد الردعان
يامرحبا ترحيب والتاريخ غالب ومغلوب=والوقت يجري وانت لاتجري يامكفي البلا
سيّر قدم رجلك وطالع بالفضا من كل صوب=حتى أن تسمع دقت النجري يامكفي البلا
جبار السبيعي
أخذوا حذركم وأحتسوا قدامكم خط الجنوب=مية نفق وأربع مية كبري يامكفي البلا
بالعدل والمجهود والمبدى وتصحيح السلوب=قال المثل من يلعق الصبري يامكفي البلا
محمد الردعان
الرزق يكثر عند بعض الناس وتموت القلوب=لاتعلّم اللي بالخبر يدري يامكفي البلا
الله يساعد جملة الحكام ويعز الشعوب=والليل يسري والخبر يسري يامكفي البلا
جبار السبيعي
أعرف رموز الشيفره هذا وهذاك محسوب=مافي بطون الكتب والمقري يامكفي البلا
الله يبقيكم ليا جدتم بتذليل الخطوب=جبنا الدرر من محتوى فكري يامكفي البلا
محمد الردعان
حنا نعرف أن الرحى ماصنعت الا للحبوب=خل البحر يسبح به البحري يامكفي البلا
ترى الجهات أربع وأنا بقول هبي ياهبوب=واللي تأخر ماوصل بدري يامكفي البلا
جبار السبيعي
مافيه عبري تاب بالامثال والـمـا مايروب=والكل يعرف منهج العبري يامكفي البلا
كثر المرض كثر الفتن كثر الضغاين والذنوب=ما داء يزول الا بدواء يبري يامكفي البلا
محمد الردعان
الهرج واجد والله أعلم بالصدوق وبالكذوب=والحرة السوداء لها حرّي يامكفي البلا
لو كل من جبناه في سد النوايب سد نوب=نقول ذا خيّر وذا شرّي يامكفي البلا
جبار السبيعي
أعرف هروج الناس كثر الناس والجو معروب=والعلم واجب طايل الشبري يامكفي البلا
اللي يصلّون العشاء جمعٍ وقصر مع الغروب=صلوا صلاة الشفع والوتري يامكفي البلا
محمد الردعان
دخلت في سوق المدينة مالقيت الا الحروب=والحربي أن باع الذهب يشري يامكفي البلا
وأنا حزمت البطن للشعار والراس معصوب=واللي عرفني ماعرف سري يامكفي البلا
جبار السبيعي
يوم أن بعض الناس مشغوله بترصيص الجيوب=أنا الهجوس مضيقٍ صدري يامكفي البلا
الناس تبذل جهدها والله علام الغيوب=هو الذي بأمره مصير أمري يامكفي البلا
محمد الردعان
اليا هربت من الذيابه بارك الله فالهروب=أسلم قبل لاينحفر قبري يامكفي البلا
تبنا وتابوا ربعنا وأبليس عيا لايتوب=وشعر السبيعي سابقٍ شعري يامكفي البلا
جبارالسبيعي
الرعد يرعد والبروق تلوح في عرض النصوب=لكن بلغ عيد والوطري يامكفي البلا
مادام تبتم ياسلالة عبس ضموا للعتوب=معنا بحزب أحمد لك الاجري يامكفي البلا