قصيده للشاعر عايض فرزان السبيعي في قبيلة السوده

[عاشق الباديه]

يالله يامـبـدل الـشـدات بالإنـفـراج=ياوالـي الكون والدنيـا وتصريفهـا
أبدا بذكـرك وذكـرك ياإلهـي عـلاج=يشفي قلوب البشـر ويقـوي أضعيفهـا
هاضت هجوسي ودوب الشعر جاله مزاج=شرد البيـوت الصعيبـه زان توليفهـا
اختار وأنقي اللي مادخلها السمـاج=كن الذهب والجواهـر فـي محاريفهـا
نور القمر قدمها ماهوب نـور السـراج=اشوف براقهـا واسمـع رعـد صيفهـا
هلت وطلـت معانيهـا فـرح وأبتهـاج=ومناسبتها المعزب صار أخـو ضيفهـا
سلام يالابـة ٍ ماهيـب تشـرب همـاج=من ماضي أجدادها وعصـور اساليفهـا
سيرة وفا واستقامه مادخلهـا أنعـواج=تاريـخ الأمجـاد مايجهـل تواصيفهـا
بقيادة الشيخ ابن باحص طليق الحجـاج=عقيـد قــوم ٍ تشرفـنـا مواقيفـهـا
العزوه اللي مفاخرها على الـراس تـاج=سلالـة ٍ نفتخـر فيهـا وفـي قيفـهـا
الآد سـوّاد لاجـا للحرائـب عجـاج=تشقر عصا القـوم وتفـرق مواليفهـا
منها يصيب العدا خوف وقلق وانزعاج=أمجادهـا عـز مايثلـم شبـا سيفهـا
لاثار عج الرمك والجيـش والـدم راج=تعـرف مـن أفعالهـا قـدام تعريفهـا
نزالة المرتـع اللـي ماحـدا ًفيـه داج=قطعانهم فيه ترتـع مـا أحـدِ يخيفهـا
ونهيد وسويد مثل العين هي والحجـاج=مراكز الطيـب عـدوا فـي مشاريفهـا
بيت المراجل حجر ماهوب يبنـا زجـاج=لأجله ماتحسب هل الطالـه مصاريفهـا
لو المراجل تباع وتنشرى فـي الحـراج=كان اشترتها الرخـوم وخربـت كيفهـا
لـكـن مابـيـن لاهــذا ولاذا إزدواج=كـل الرسائـل تبيّـن مـن مظاريفهـا
اليوم عصر السعوديـه أمـن وإندمـاج=في ظل صقر العروبـه عزهـا ريفهـا
الذيب لو كان بعيونـه يشـوف النعـاج=من زود خوفه يجنب غصـب ويعيفهـا
واللي يصيبه من الأيام بعـض الخـلاج=يقـرا سجلاتهـاويراجع ارشيفها
العدل دستورها ما أحد ٍ عن العدل مـاج=على طريق الهدى بيـض ٍ مصاحيفها
وحنا جنود الوطـن ولمملكتنـا سيـاج=نذود عن برهـا ونـذود عـن سيفهـا

[مناحي المجمعي]

صح السان الشاعر عايض فرزان السبيعي





وصح السانك علي النقل ياعاشق الباديه

[البحيح]

شكراً يا عاشق الباديه على القصيده الجزله

ابداع رائع

الاد ابن سويد يستاهلون المدح وقليل في حقهم

[عاشق الباديه]

شكراً للجميع على تعليقاتهم ومشاعرهم الطيبه تجاه القصيده وقبيلة السوده يستاهلون المدح
وهم غنيين عن التعريف الآد سواد





وتقبلوا تحياااتي





عاشــ الباديه ـــــــــــــق

[عبدالعزيزالجهمي]

عاشق الباديه الله يعطيك العافيه على نقل قصايد
علم من أعلام الشعر وهو الشاعر عايض بن فرزان
الجهوم لحيث ان مدرسه شعريه يسنتج منها مثل
هذه الابداعات من قصايد المدح والحكم والنصح
وغيرها من المواضيع اللتي يتطرق لها الشعراء
في ماضي الزمان وحاضره .... لاهنت

تقبل تحياااتي

[الذكي]

مشكور ياعاشق الباديه مقصرت