% بحث مصغّـر عن ( عـرق سبـيع ) نبذة وصورة وأبيات %

[عـقيـد الـقـوم]

_( عـــــرق سبـــــيع )_

-----------------------------------------------------------

«عرق سبيع» : يقـع في عاليـة نجـد وهو مشهـور بكثبانـه الرمليـّـه .

أمّـا مساحــــــته فهـو يمتد طولاً من الجنوب إلى الشمال يحث يبلغ طوله أكثر 300 كلم تقريباً ومن 50 إلى 80 كلم عرضاً ، وقد حما بيض النعام فيه الشيخ فيصـل ابن هذال شيخ القريشات من سبـيع .

والأسم الأصلي الذي يفترض ان يطـلق عليه هو ( عـروق سبـيع ) لأنه ليس عرق واحد فقط بل عروق كثـيره ، وقد كانت قبـيلة عامر ابن صعـصعه تقطن هذا المكان قديماً في الجاهليّـه ثـــمَّ ورثوه سبـيع منهم واستقرّو فيه إلى هذا الـيــوم

امّـا عن شكل الأرض الجغرافي للعـرق فأرضه منبسطه وذات كثبان رمليّه ناعمه تشبه رمل الثمامه الذي في الرياض ( المنـتـزه البرّي الذي يأتونـه الشباب )

وهي مفـضـلّـه عند راعي الأبل اكثر من المراعي الأخرى لجمال ارضها الخصبه وبعد اهل الغنـم عنها لأن الموارد فيها قلـيله وبعيده نوعاً ماء ولايصبر على المجيء إليها إلا الـبل فهي مشهوره بالصبر والتحمّل بعكس الغنم لذا يبتعد اهل الغنم عنها ويتمتّعون بها اهل البـل

*
*


يقـول الشاعـر محمـد ابن علي ابن جغيثـم القريشي في قصيده له طويلـه منها ما يخص هذا الموضوع :

العرق لسرفـات الخلايـا مداهيل = كمً عـقيداً لاطمعهـا لطمنـاه

ويقول الشاعر مسعر ابن ركّـاض من بنـي عامر :

الـعرق مدهـال البكـار المشاعيف = والفاطر العرّا تمـنّـا جـــــنابـه
مدهـال صيدً في العثاميـر ماشيـف = لاجا على الضيحـه تكاشف ثيابـه
ماهوب مدهال الغنم كل ماصيف = لامرّهـا الشاوي تمنّـــــــى شرابـه

ويقـول الشاعر عبد العزيز ابن سعود العرينـي :

ولنا في عـرق سبـيـع مربـاعٍ يسـر الناظريـن = لاركّبـت غـر السحايـب ثـم هـل اخيالهـا

ويقول الشاعر محسن ابن علي ابن جغيثم القريشي :

والعرق عرق سبـيع بالخير والشر = شيً موكّـد ولاعليه اعتراضـــــــي
حاميـنه الجدّان بالكر والـفـــــــر = يوم المنـايـا وارداتً عــــــراضـي
بالسيف والشلفـا ورمحً معطّــــر = بدم الـعقـيد اللي يغـير انقضاضي
ومن لايحب العرق حرام يذكــــر = ويستاهل السودا بدال البياضــــي

ويقـول الشـاعـر الكبـير ../ ناصر ابن محمد الفراعنه في قصيدته الملحمه العامريه في توجيهه لنديبه ووصف الديار له حتى يصل مبتغاه

والـعـرق وزانك لمـيع طعوســـه = لميـع اصفـر التـبـري عقب ما ســال

--------------------------------------------------------------------------------------

تحياتي .

[ابن زيد الجبري]

مشكور يا عقيد القوم

ما قصرت الله يعطيك العافية

[ابوحمدان]

	- لاهنت ياعقيد القوم.. استمر في مثلها لاعدمناك..

[ابوعضيدة]

يعطيك العافيه على هالمشاركة الطيبه.

[عـقيـد الـقـوم]

ابن زيد الجبري ..

لا شكر على واجب فمثل هذي المواضيع يجب ان يعرفها الكل

-----------------------------
ابو حمدان ..

ومن يقول ما يهون وسوف نكتب مانعرفه عن قبيلة سبـيع سواءً عن معاركها ومناخاتها او ديارها ومواطنهـا

------------------------------
ابو عظيده ..

الله يعافيك يالغالي

[عين الصحافة]

يعطيك العافيه على هذا التقرير

[كليب]

مشكور وما قصرت والله لا يهينك