بـــســم اللـه الرحمن الرحـــــيم
..
..
..
هذي جميــع القصايد للشاعر الجزل صاحب المعاني القويّــه والمفردات السلسه والإلقـاء الرائـع ../ بــدر ابن سـعـد ابن خرفـاش المليـحي السبيـــعـي ، التي سمعناها في الإعـــلام سواءاً في برنامج شـاعـــر المليــون او غيره
والصراحه يبهركــ هذا الشاعر على ان بدايته في الشعر قريباً إلا ان مفردات قصايده تشعرك انّه كبير في السن من حيث قوّة المعنى
اترككم مع قصايده .
***********************
(( الـــحكـــم ))
1 :
يا عبد ربه فوقك اللي يحاسبك = انصحك لو ماني عليك متولي
لاصرت تسمع داعي الله يندبك = قدمك وملهيك الغناء والتسلي
ومن راح للمسجد طريقه يمر بك = على الرصيف بجلستك ماتملي
استح على وجهك ودمك وشاربك = قم صل عمر الادمي مضمحلي
ولا اترك الشارع عط الناس غاربك = اذلف لعلك للهدى يالمولي
خل العباد عيونها ماتراقبك = لا صرت لا نايم ولا انته مصلي
حتيش لو متوفراتٍ مطالبك = مصيرك الدار الضلام المذلي
لاحولوا بك في مقرك قرايبك = واللبن خلو وقفته تستقلي
اطيب ربوعك بكثرالرمل يتربك = لوكان عينه من فراقك تهلي
ولا ركزت من فوق قبرك نصايبك = جولك معازيبك بهاك المحلي
ياضيف وش ظنك طعامك ومشربك = ومثواك يوم البعث ياضيف قلي
خاصم ضميرك قبل تكشف حقايبك = واحسب مواثيمك بسنتي وملي
الرب خلا فيك عقلٍ يخاطبك = ويبين الدرب النقي والمضلي
وبالعافيه والحس والسمع واهبك = وبالشوف وفوادٍ يعقد ويحلي
فكّـر تمعّـن والدلايل تحيط بك = غرايبٍ عن قدرة الله تدلي
عان السما محبوكةٍ بالبنا حبك = اللي بنور نجومها نستدلي
والشمس تكشف كل شيٍ بجانبك = والبدر في سود الليال متجلي
والارض هي اخر مراسي مراكبك = تعلاك وانت اليوم فوق متعلي
ان طعتني غير مناحي ركايبك = واتبع طريقٍ صاحبه ما يذلي
2 :
يبحل العاقل بعرفه مع الناس الغشم = بالسلام يرد لا خاطبوه الجهلي
فالتجارب عبرة لمن يشوف ويفتهم = والعقول ووزنها في يدين المعتلي
من عسف نفسه على طاعة الله استقم = ومن تبع نفسه تزجه من اعلى لأسفلي
فكان تبغى الخير للفرض يابن آدم اقم = بخشوع الخاضع الزاهد المتذللي
وعن طريقٍ حرمه خالقك شم واحتشم = مرقب العليا عسيرٍ على من يكسلي
ولا تعجب لو زمانك على كبدك وسم = دبرت اللي يدبرك والزمن متحولي
ولا ترجى راعي المال لو عرشة عظم = الاجل محتوم والرزق كافله الولي
الله الرزاق وان جتك فرصه فاغتنم = السماء لو اسبلت بالذهب ما تسبلي
وميز اللي يحقرك والذي لك يحترم = وعامل اللي يعاملك بالذي لك يعملي
فلو تساوي مثل نار الغضى نار الفحم = كنك اللي فالطلي بالبعير مبدلي
ولو تقدم للعرب من لحم جوفك لحم = ما تحصل في كثير العرب متجملي
صنعة المعروف فاللاش ناتجها الندم = مالها في ضرب الامثال يالطيب حلي
غير من ضيع نهاره يحاكي له اصم = هل على هذا مشاريه يالرجل الشلي
عز نفسك عن طواريق مهفين الذمم = لا ظلال بشجرة الحنظله او مأكلي
رافق اللي لو يوقف زمانك لك خصم = كرّس جهوده وهمك بقلبه يصطلي
والرجل يكظم بصدره على جرح ابن عم = مايخلي بينهم للمعادي مدخلي
ولا تفيض حدود فيض المحاجر من عدم = مايفيض الحاجر الا وحده ممتلي
3 :
وانفس ياللي ماتبي من حدٍ شي = ولا تبي بذر الجمالات فيها
لو كان ماتملك جنيهات وحلي = مقـتـنـعةٍ باللي تطوله يديها
تسعى لعفو الواحد الباقي الحي = تصبح على الطاعة وتمسي عليها
يا عاشق الدنيـا مسراتها زي = وسميةٍ صلف الهوا مقتفيها
لعل ينجيها من النار للفي = اللي رجاها به ولا يرتجيها
4 :
مانعرف الغيب يدري عن الغيب العليم = في يديه كتاب علم الشقاوه والسعد
مالنا الا ماسمعنا من لسان الكليم = والنوايا يعلم بغيبها الفرد الصمد
التنبّـي صعب والود للقلب السليم = ومن تحزم بالوفا والصراحه مانشد
مايثمن كلمته لا هرج غير الحكيم = ولا تلد عيون عاقل لعين(ن) ماتلد
ولا يسامح زلة الجاهلين الا الحليم = ولا يجازي زلة العامدين الا الأسد
فالمنابر شعرنا مايضام الا يضيم = ولا يضيم الا قويا تهيمن واتحد
من نوانا نحتسيله بفارية الصميم = ضربة(ن) في القلب تهلك بها اعضاء الجسد
واهجاً من ويــل لامن بطشنا بالغريم = وريحة الفردوس لامن مدحنا من نود
ماشحنا من بصفر الفشق يملا البريم = ويش خانة شاعرن مايشد ليا قصد
ميزة الشاعر اليا ورد يروي اللي محيم = يدفن المعنى حرافه ويخفي ماقصد
يوم فكرت بجديد المورخ والقديم = من على المجهر بعين القريب المبتعد
وقفتني فكرتي فوق مدهال العديم = شاهقاً لا مرّه الغيم فك الملتبد
وقفة(ن) يجهل بها العقل ويشيب الفطيم = ان قدمت الموت وان عدت عشت بلا رغد
وش يعذر منك ياشرهة عيون اليتيم = وش يعذر منك يادم شيخ مابرد
وش يعذر من عروس بكاها مستديم = وش يعذر من ضرير لنجله مفتقد
دام تربطنا العروبه من الساس الكريم = ماتفرقنا الجوازات وحدود البلد
يا اخوان الصلب والنطق والشرع القويم = لو ترونا في سعاده ترانا في كبد
ماجهلنا اللي كشفتوه في الليل البهيم = شايفين ماتشوفون لاكنّـا نصد
جدد التاريخ ماضي سنينه يافهيم = واتعس المتعس بتمثيل دور المعتمد
بانت الرويا بعد ماصفا الجو المغيم = وانفضح خافي مسا السبت في صبح الأحد
داخل اسوار البساتين منزال(ن) حشيم = في عيون اللي ورا اسوارها عيشه نكد
ومن ورا الاسوار منهاج عيش المستقيم = في عيون اللي بزيف الملذه مضطهد
ولا ينوشون الحسايف خفايف سين جيم = استقرت في مقر(ن) قراره للأبد
فاعتبر ياطالب الرشد واضحك ياغشيم = في نهار البعث يدري بربه من جحد
(( الــغــزل ))
1 :
انا لي وليف غاب عني سنه وشهور = بحكم الظروف الي تصخّـر مصامدها
على الصوت سمعي منه فيه بهجة وسرور = بالارسال ولا بسمة العين فاقدها
ولا يثر غيابه على قدرها المخبور = وبعض ناس يوم يشوفها ما يزودها
وسط الحشى له منزل بالغلا معمور = على ذكريات دارسات جدايدها
لا قمت اتكذرها خطير تقد الزور = وتطلق يدي الحاجه الي مجودها
يغيّـب علي لو عندي من العباد حظور = وتبحر بي افكار بعاد مقاصدها
واتابع شريط داخل الذاكره محفور = من افلام من واقع حياتي مشاهدها
مع الجادل الي كنّّـهـا من خيار الحور = عن البيض ربي باكمل الزين فاردها
(( الــــوصـــف ))
1 : في وصف البــل قال
انا عن جميع الناس يدويبي الهاجوس = مع الغاشيه في البل وافكر وارتبها
آيات ذكرها الله تنور كما الفانوس = بقود تميز زينها من مناسبها
طوال اللحي فج المناحر كبار الروس = ومتفهقات سنمها عن غواربها
يجي عقل راعيها على حبها ملموس = لو انه بعيد افكار عقله تقربها
على شوفها يستاسع الخاطر المعموس = عطايا الله اللي مدته مايشحبها
لحمها قرى وان قل مالك تجيب فلوس = وتنقل عليها والغذى من محالبها
2 : وفي وصف ولائـه للوطــن قال
هالأبيات تسوى مانظمته من الأشعار = ليا قلتها لو عقبها اظهر من الطابور
علشانها في دار حماية الأقطار = دروع العرب لامن حرب كل غاوي شور
ديار(ن) ماتحكم بانتخاباتها للدار = آل سعود هم حكامنا اللي علينا نور
سندنا سعدنا عزنا سيفنا البتار = لاشفنا من الوقت العرى والزرى والجور
لهم بيعة(ن) في ارقابنا ترهن الاعمار = على الموت نقلط في رضاهم بكل سرور
ولانا لهم وانا لهم في جهر واسرار = نفدي بروح(ن) مالنا عقبها مذخور
(( الــــمــــدح ))
1 :
نــهـر الـنـيـل ، في سلطــان ابن عـبدالعزيــز
بذكر الرحيم الواحد الماجـد المنان = بــديـــنــا ووكلنا عليه امــــرنا توكيـــل
إلاه الخلايق مجري الدم فالشريان = مجيب الدعا حمّـاي بيته من اهل الفيل
مدير الهبايب عالم السر والأعــلان = مقـضّـي النوايـب مسقي الأوديه بالسيل
هو اللي كسا بالعافيه صحّت الأبدان = بلـيّــاه ماللعبـد قوّه وعزم وحيـــــــــل
ومن بعد ذكر الواقي الباقي الرحمـان = سلامي سلام العز والقدر والتبجيل
سلامن بريح المسك والعود والريحان = وريح الخزامى والنفل والزهر والهيل
وشذى ياسمين الطايف وزعفران ايران = عدد ماضى من ليل وعداد مقبل ليل
وعدد مايهل السيـل من صـادق الأمزان = وعدد ما يشعشع فالسما نور نجم سهيــل
وعدد من خشع لله يرجيه بالغفـران = وعدد مامشت رجلً على شط نهر النيـل
سلامن يليق بحظرتك سيّدي سلطـان = تسوقه مشاعر شاعرن مابها تضليل
على مدحك الأفكار طاعت بلا عصيان = توارد بجزل الشعر بدون حط وشيل
تكاثر وتفخرب يوم تنسجبك القيفان = وفي غيرك القيفان للي دعاها نحيل
ياراع القبال اللي تباشربه العربــان = ابوجهك بمضمون السعد للعرب دليل
ياخيرة عباد الله بهالوقت انس وجان = يانور القمر بالأرض يالهيلع الحلحيـــل
يا دفّان ضلع الفقر يا مغني الفقران = عطاياك مثل السيل ماهيب عد وكيل
على طيب ذاتك تعترف جملة الأديان = بما قدّمت يمناك من مقصدً نبيل
تبنّيت يتماً مالهم فالحياه ابوان = بعد مافجعهم وقتهم بالعنا والويـــــل
تحظّنتهم بموسّسـه تكفل اليتمان = وزرعت التبسم والفرح في يتاما الجيل
ومشيت راتب للـلأرامل من النسوان = ولاتطلب الا اجراً من المعتلي جزيل
وكم من مريضً ميّسً طايحن تعبان = تعب واتعب اهله بالمشافي بلا ذبيل
وزهد في حياته يحتري جيّت الديّـان = كفلت سفره بأمراً ينفذ بلا تاجيل
وعاد متعافي والمرض كن ماقد كان = بأمر الله البادي ثم بفعلك الجميل
ونخاك السجين المنحشر من ورى القضبان = بعد سوّلتله نفسه بذبحة القتيل
لعبه غضب ساعه وزيّله الشيطان = ولولاك بعد الله على المقبره قد شيل
بعيدً نظرك وطمرتك طمرت كحيلان = ودمثً جنابك للخوي يبرد الغليل
حليماً على الجاهل وعدلً كما الميزان = ورايك يحلّل محكمات العقد تحليل
لو الطفل فالمهدان بأسمه له استمكان = من كل الأسماي عطي حريّة التفضيل
تركها وقال افضّل يقالي سلطـــــان = على اللي يصد الموقف الكارب الثقيل
طويل الذراع النادر مجلّي الأحزان = ومن طيب حظّه مايسمّى عليه بخيل
تواضع وعطف ولطف ومجامله واحسان = وبشاشه تخظّر قلبً من الهموم نحيل
وكفً ندي يكرم ليا شحّو العربان = بوقتن ينشف اللهاه من التنكيل
ولاهو غريبً منك يامعرّب الجدّان = يابهجة كسيف الحال يامزبن الدخيل
خوالك صناديد الوغى قدمك الشيخان = وجدّانك ملــوك العرب مضرب التمثيل
ملوكً تضمّن حكمها منهج القرآن = على الشرع يمشي حكمها الصلب ما يميل
اهل عزوة العوجا ليا عسكر الدخان = على ساحة الميدان بأهل النظا والخيل
والأرياق يبست والسبب زوغة الأذهان = مواريد حوض الموت صدّارها قليل
تخظّب سيوف العالم الحيّه الدمان = والأموات حدر الأرض ما جالها تنزيل
لهم هدّةً يشبعبها مومي الجنحان = ينجّابها الصاحب ويفنابها القبيل
دروع الجيوش اللي تتقابها الفرسان = مضاريبهم من صقر ولا شظايا ويل
مضاريبهم تعرف من ماضي الأزمان = فرح عين من صادق عما عين من يعيل
وعلى نهج اوايلكم بنيتو على السيسان = بنيتو وثابرتو على غير لف وميل
خذيتو زمام الملك فالأرض والسلطان = بعد راد ربّي بشذرة المرهف الصقيل
جهمتو بليل نور نجمه خفا مابان = وباشرتو المصّمك ونود الهوا عليـــل
ومع الفجر شلتو بالحدب جمجمة عجلان = وسقا فرحه بالتغاريد والتهليل
وبعد ماستقر الأمن شيّدتو العمــران = وبالأصرار حقّقتو حلم كان مستحيل
دعمتو هل الحرف ووطنتو البدوان = وكوّنتو اهل العلم من عالمً جهّـيــل
وعلى العلم حثّيتو وطوّرتو السكّـان = وبذلتو جهود ومـال والغايه التعديل
وعبّدتو الزفلت للنقل فالبرّان = لجل تسهل الطرقه على العالم لارحّيل
وبالمدن نور الكهربا يجهر مسيّان = وعلى البعد كنها بالدجى شعلة القنديل
رفعتو وطنّا فوق عن مستوى الأوطان = بنيتوه بالتخطيط والعزم والتمويل
لين اصبح افضل مستقر عيش لـلأنسان = رخى وامن تحت ظل حكومةً ظلّها ظليل
فلكم من وطنكم غاية الشكر والعرفان = ترفرف لكم بيضا على قمّة الطويل
فعسا ميتكم في جنّة الخلد له مسكان = وعسا حيّكم يبطي عن ساعة الرحيل
2 : في محمــد ابن زايد
تداعي ياهجوس الشعر لامنه دعـاك الـداع = كنوزً ممتلكها فـي الحشـا مانيـب خازنهـا
اجمل لابتي فالمحتضـر بالجـزل والابـداع = عقود الدر واللولـو مـن الافكـار اكونهـا
اعيف السهل واعشق كل قاف لادعي ماطاع = واجيب المفردات الـي تسلـي مـن تمعنهـا
طرات الشعر معنى مبتكر تطرب له الاسمـاع = تسج الناس معه من الظروف الـي تزامنهـا
وبعد شبه انقرض جزل القصيد الحر بالاجماع = واراضيه جدبت واعيونها غـارت بباطنهـا
ولاعاد امطرت بالماء سماه وخابت الارمـاع = بعثها اموات الاشعار الجزيله مـن مكامنهـا
بعثها الي لصعبات الامـور الكايـده طـواع = محمد مأسس النهضـه ورايدهـا وصاينهـا
محمد يحمده مستنجده مـن جايـر الاوجـاع = كريـم مدتـه شمـخ جبـال الفقـر تدفنهـا
جزيل المد سقم الضد نور البدر فوق القـاع = قوي العزم راعي الهزم والرحمـه بموطنهـا
ملاذ اللاج والمحتاج باهـج مهجـة المـلاع = يضو الروس فوق وروس من العالي يطمنها
شبيه الليث غيث المستغيث معدل الاوضـاع = شياطين البشر في حضرته تتـرك تشيطنهـا
نسل زايد حكيم العرب دمث الخلق واف الباع = عسى قبره تعلـه غـر الامـزان بغشاينهـا
تفكر وافتكر فكرن بكـر ماقـط قبلـه شـاع = غفال ماعليها قبـل وسمـه وسـم يرهنهـا
وتخير له رجال مامشت بالغـش والاطمـاع = ذممهم مع ضمايرهم نزيهـه تنطـق السنهـا
فهامن بالطروق ويقنعـون مخالـف الاسنـاع = اليامن جـاب لـه منظومـةً تفقـد توازنهـا
واذا تاه الدليل وضاع رايه رايهـم ماضـاع = بنادقهم علـى النيشـان مايخطـي مقننهـا
هذا القول الصحيح الواضح اللي ماعليه قناع = سما فوق البرامج شاعر المليـون واحزنهـا
ولو كثروا نواقيده علـى التلفـاز والمذيـاع = دروب الانتقـاد ثنيـن محـد ظاهـر منهـا
الاول ينقده حقد وغرور وغيض واستلكـاع = وياتـي لـه بحجـه مالهـا شـي يبرهنهـا
والاخر كالنبات الي لنـور المشرقـه تبـاع = صبغته بالسواد وهـو بـلا جـدوا يعاينهـا
روابع والروابع في تراكيب العقـول انـواع = حد ينزل بهـا واحـد علـوه مـن تمكنهـا
ومنتوج الكلام الصافي الـي ماعليـه اقنـاع = سما فوق البرامج شاعر المليـون واحزنهـا
*
*
*
اتمنّـى ان يعجبكم هذا الديوان المصغّـر :)
وفي حالت ظهور اي قصيده لشاعرنا سوف اظعهـا هنـا
تحياتي لكم واهدي هذا الموضوع لـلأخ العضو المخلص ../ ابو عبد الله .
غير متصل
