بسم الله الرحمن الرحيم
إخواني الكرام / أعضاء ومتصفحي منتديات قبيلة سبيع بن عامر الغلباء السلام عليكم ورحمة الله وبركاته وبعد : إليكم قصيدة الشاعر الكبير / حبيب العازمي وفقه الله وحفظه سامح الله من قصدني واعتمدنـي بالخطيـه ومناسبتها أن الشاعر / حبيب العازمي تعرض للوشاية والتعرض له من قبل المغرضين فما كان منه إلا الرد الموجز بهذه القصيدة البليغه فلله دره من شاعر ويقول فيها :-
وهذه القصيدة مرتجله بصوت الشاعر / حبيب العازمي :-
http://www.qassimy.com/nu/voices-action-show-id-235.htm
سامح الله من قصدني واعتمدنـي بالخطيـه
= من قريبين الجدود ومن بعيديـن الجـدودي
دايـمٍ ما يفلـح اللـي غيّـر النيـه بنـيـه
= والخطيه كـان ما تنقـص تراهـا ما تـزودي
خابر إنك ما تـروح بعيـد يـا راع الرديـه
= لو مشيت ألفين كيلو ما تعديك الحـدودي
أنـت طرقـيٍ معنّـى لا شـداد ولا مطيـه
= لا أنت فتال العقود ولا أنت حلال العقـودي
لو تحّزم بالرصاص ولـو نقلـت البندقيـه
= الرصاص يذل والبندق تذل مـع الشـرودي
هبّ وأنا راعـي العشـوا وخيّـال العبيـه
= كيف يا رخو العضود تضد مفتول العضودي
والله إنـي لا كليـل ولا ذلـيـل ولا علـيـه
= مير أحسب لي علومٍ ما بقي منهـا وجـودي
أحسب حساب الرفاقه والمـروه والحميـه
= حشمة للطيبيـن اللـي بعضهـم فاللحـودي
نظرتـي فالطيبيـن ونظـرة الحسـاد فيـه
= كلها نظرة حسد والعود في عين الحسـودي
والله إني ما ادعيـت بحجّـةٍ ما هيـب ليـه
= حجتي ما تنجحد واللي جحدها من شهـودي
خافوا الله يالقضاه اللـي تعرفـون القضيـه
= الصحيح يسود والباطل مصيـره مايسـودي
لا مطالبكـم بديـن وذمتـي منكـم بـريـه
= ما بقي غير العلوم اللـي يبيحـن السـدودي
بيّنٍ عيـد رمضـان وبيّـنٍ عيـد الضحيـه
= يا عسى الأول يعود ويا عسى الثاني يعـودي
يا قطن جاتك مزوّعـةٍ مـن الحـرّه طميـه
= مستخفّه عقب كانـت لا رمـوح ولا هبـودي
ساقها عشق الجنـون وساعدتهـا الجاذبيـه
= لين عدتهـا الجبـال المستطيلـه والنفـودي
معجزه في عصرنا الحاضر وعصر الجاهليه
= الهوى صاب الحجر ما به قلوب ولا كبـودي
وين قيس بن الملوح ويـن ليلـى العامريـه
= كيف ما ينصفهم اللي ينصف ديانـا ودودي !!
والعزا فيما بقـى واللـي بقـا فيـه البقيـه
= مرة الأيام بيـض ومـرت الأيـام سـودي
يالله اجعـل خاتمتنـا بالسـلام وبالتحـيـه
= ونتوفى محرمين وفي حرم ربـي سجـودي
منقول مع خالص التحية وأطيب الأمنيات وأنتم سالمون وغانمون والسلام .