إخي الغالي سعود بن سلطان المفالحه وصلتني منه رسالة على الجوال وفيها ابيات جميله عباره عن رساله تواصل يقول فيها:
يابويزيد اللي مضالك تجاريب=عرفت فيها الحب والمقدريه
عطني رايك ياقليل العذاريب=في قلبي اللي راح غصباًعليه
ماراح بالقوه وضرب المشاعيب=بالعكس قدمته براحة يديه
عطيته اللي به الظن مايخيب=يفداه لكن مالي الا السويه
قبلي صعيب الحب عذب لشانيب=وش عاد لوراحت حياتي ضحيه
ومن باب التواصل معه ومعكم رديت عليه بهذه الابيات التي اتمنى ان ترتقي لذائقتكم
يامرحبا مليون مليون ترحيب =من قلبي الصافي ومن صدق نيه
ترحيبتاً ماتقبل الشك والريب=يسوقها ذعذاع نجد العذيه
بسعود بن سلطان راعى المواجيب=حراً ولد حراً عزومه قويه
والحر لامنه الزمته المقاضيب=خدم لها لوكان نفسه شقيه
فأنكان صابتك السهوم المعاطيب=عزالله انك رحت فيها ضحيه
الحب بلوى يابوسلطان ويصيب=حبله يجيله ليتاً فوق ليه
ومادام صابك فأعتبر مالك مجيب=وإنصحك من هالحين سجل وصيه
أكتب عليها ياحصان الاطاليب=أنا قتيل الزين رادع شفيه
لاتحسب إنها لك بتصفى المشاريب=عينت قيس وقصة العامريه
الى سطى بين الضلوع المحاديب=أبطيت ماذقت الحياه الهنيه
عقوبة من عالم السر والغيب=وبليته ماهيب أية بليه
بدايته بسمه وهمسه وترغيب=ونهايته كيه وكيه وكيه
يعلم الرجال وش يعني الشيب=الى غزاء راسه وسنه فتيه
ويعلمه فن الحيل والاساليب=ويدرسه نظرية الجاذبيه
ويعلمه وشلون تصبح لاكاذيب=حلال حتى والنوايا بريه
قلته وإنا مدبني الوقت تأديب=وقتاً مضى مابين روحه وجيه
جنبت عن درب المحبين تجنيب=بعد دفعت رسومه الجمركيه
تمت يابوسلطان يامنبع الطيب=بالعود الازرق والسلام وتحيه
........
غير متصل
