قصيدة عبدالمحسن بن محمد بن علي آل فليج

[المتقصي]

قصيدة لعبدالمحسن بن محمد بن علي آل فليج العريني قال فيها:

يـا رب وش ذا العجايـب=في ذا الزمن قلبـي هايـب
و انـا اتحـرى سبـايـب=فـي حـال جيـل البثـاره
أدركـت حـال خطـيـري=مـن شافـه حتـم يطيـري
هـذا البـلا وش يصيـري=يـا نـاس تكفـون شـاره
شبـابـنـا بـهـذلـونـا=فـي سلمـهـم أخلفـونـا
فـي سيـرهـم أتعبـونـا=كــل كـوانـا بـنــاره
مـا يسمعـون النصـايـح=اختـاروا درب الفضـايـح
من يسلكـه يمسـي طايـح=يسلـك طريـق القـشـاره
وحــد حيـاتـه مـكـدر=ياكـل سمـوم و تـخـدر
نزل حضيـض(ن) و حـدر=مـا خـاف قصمـة فقـاره
و حـد(ن) يمـز السجايـر=راحـت حياتـه خسـايـر
لا بـده يجـنـي حسـايـر=موتـه مخـتـم قــراره
أحد(ن) في الأسواق نـازل=مـا مهنتـه غيـر يغـازل
و دك تحطـه فـي عـازل=أو تنطلـه مـن عـمـاره
و حد(ن) خبيث (ن) و صايع=يمشـي دروب الفضـايـع
للمرجلـه صــار بـايـع=مــا فـيـه ذرة نـعـاره
و حد(ن) يفحط على النـاس=و لا رفقته غيـر الأنجـاس
هـذا ذكـا أو بعـد يـاس=يفرح لى مـن قيـل طـاره
و حد(ن) في ليله ما يهجـع=للبيـت هاجـر مـا يرجـع
بحر الردى صار مضجـع=معدود فدم(ن) فـي حـاره
و حد(ن) مزاجه في راحـه=فـي كـل يـوم استراحـه
مـا مـن جـدا أو رباحـه=يـا ليـت يسجـن بـداره
و حـد(ن) يشجـع نـوادي=مـن أجلهـا قـام يعـادي
كثـر عليـنـا الــدوادي=أمضـى حياتـه خـسـاره
و حد (ن) يجامـل رفيقـه=و اهلـه يعانـون ضيـقـه
الخيـر ضـيّـع طريـقـه=ما يسوى في الدنيـا بـاره
و حد(ن) يقاطع فـي ربعـه=يقفي كمـا اقفـاي ضبعـه
يشكي في هالدنيـا وجعـه=حطـوا علـيـه الـوثـاره
و حد(ن)يخـلّـي لبـاسـه=متبـري(ن) مـن أسـاسـه
يلبـس لـبـاس البـلاسـه=و يظـنّ هـذا حـضـاره
و حـد(ن) يعلـق أسامـي=أهـل الخنـا و المـلامـي
في الخلف و يـا الأمامـي=مثـل البـزر فـي القتـاره
و حـد(ن) تقصّـد نمـايـم=يـنـم قـاعـد و قـايــم
في بحـر الأخطـار عايـم=ما خاف من المـوت غـاره
و حـد(ن) لسانـه يـمـده=حتـى علـى اللـي يـودّه
مـن يوقفـه عنـد حــدّه=يلقـى جــزاة الجـسـاره
و حـد(ن) كثيـر كـلامـه=دوم(ن) علـيـه المـلامـه
ما مـن هـدى أو سلامـه=يـا كـود ضيّـع وقــاره
و حـد(ن) يفاخـر بقومـه=يهـذي بهـم فـي حلومـه
من كانـت هـاذي سلومـه=لـزوم يـتـرك مـسـاره
و حد(ن) مضيـع دروسـه=يعـض منهـا ضـروسـه
ياليـت رجـل(ن) يدوسـه=قبـل الفشـل و الـثـواره
هـذا الشبـاب وش بلاهـم=الخيـر ربــي عطـاهـم
نسيـوه و اقفـوا وراهــم=و الله خـسـروا تـجـاره
منهـم سريـع رجـوعـه=يبغـى نصيحـة ربـوعـه
الخيـر و افـق طبـوعـه=يحتـاج مـن العلـم مـاره
أمّـا الـذي رز خشـمـه=ما يستحـق مـن يحشمـه
قـدره يــوازن بقشـمـه=قـدره بيـن النـاس فـاره
نطمع بجيـل (ن) طموحـي=جيـل المعالـي لمـوحـي
هـذي الأمانـي و ابوحـي=يا هـل التقـى و الصقـاره
هاذي صفـات(ن) عظيمـه=يعشقهـا راعـي الشكيمـه
و ين الصبـر و العزيمـه=يــا الله تـرفـع مـنـاره
ترى العمـر حسبـة أيـام=أمـا الجـزاء دوك قــدّام
حذراك من ضيعـة أعـوام=عـلـى اللهو و السـمـاره
ناديت بالصوت و ازريـت=و لا ظنّـي إنـي تماديـت
هـذا الأمـل لـو تمنيـت=في كل وقـت(ن) و تـاره
هذا و صلـوا علـى مـن=من أرسله صاحـب المـنّ
محمـد اللـي قـد أمّــن=أهـل الكفـر و الـغـداره

[عجمي رخم]

صح السان الشاعر وتسلم يمين الكاتب

[المتقصي]

صح بدنك يا ابن العم و لا هنت على المرور