الشاعر الشيخ / خلف بن غبين يرد على الشاعر / طلال السعيد بعدما مدح بوش

[خيَّال الغلباء]

بسم الله الرحمن الرحيم

إخواني الكرام / أعضاء ومتصفحي منتديات قبيلة سبيع بن عامر الغلباء السلام عليكم ورحمة الله وبركاته وبعد : إليكم قصيدة الشاعر / طلال السعيد في مدح بوش الأب بعد تحرير دولة الكويت الشقيقة والتي رد عليها الكثير من الشعراء في المملكة العربية السعودية وعلى رأسهم الشاعر الشيخ / خلف بن محدى بن غبين وفقه الله وحفظه من شيوخ الفدعان من قبيلة عنزة الوائلية العريقة وأرسلها إلى / أحمد السعدون رئيس مجلس الأمة الكويتي وطلب منه تسليم القصيدة للشاعر / طلال السعيد أثناء إنعقاد المجلس واّل غبين هم أصحاب المثل : ( عطية غبيني ما ترد ) ويقول الشاعر / طلال السعيد في قصيدته :-

باسم الكويت وشعبها وين ما كان = شعب الكرامة والأصالة شعبنا
يا مرحبا يا بوش من قلب ولسان = طيبك ومعروفك لشخصك جذبنا
يا بوش أحيي فيك قايد وإنسان = شجاعة الموقف وحزمك عجبنا
يحق للديرة تضمك بالأحضان = ورّدتنا صافي القراح وشربنا
من مجلس الأمة إلى قصر دسمان = تسمع صدى الترحيب من كل مبنى
تقدير لأفعالك وشكرٍ وعرفان = قايد عظيم بجانب اسمك كتبنا
في صفحة التاريخ مكتوب عنوان = الله وثمّن بوش ولا انهبنا
عاداتنا يا بوش من عبر الأزمان = رد الجمايل والله اللي وهبنا
نجازي الإحسان حنّا بالإحسان = بالطيب والمعروف ما أحد غلبنا
يا بوش ما قصرت يا ذرب الأيمان = عرضت جيشك للهلاك بسببنا
يا بوش ما اسمك بوش اسمك كحيلان = البوش والله والتخاذل عربنا
عانيبها عدوان كانوا لنا اخــوان = يـا ما سندناهم ويا ما تعبنا
بالطيب جيناهم وجونا بنكران = وش ذنبنا وش جرمنا ش ارتكبنا
قالوا عرب أصحاب أحباب جيران = قلنا نعم لا شك من هو نكبنا
من سلط اجنوده على أعراض نسوان = من يتم الأطفال ؟ من هو نهبنا
من روع الغافين ظلم وعدوان = أرعب منام أطفالنا وارتعبنا
من خان بعهود ومواثيق وأيمان = بجدة يفاوضنا وجيشه حربنا
من لوّث البيئة حرايق ودخان = حتى شعاع الشمس عنه حجبنا
من حرّف التاريخ زورٍ وبهتان = ألغى الكويت من الوجود وشطبنا
وقام التحالف قومة أبطال شجعان = كلٍ يقول لصرخة الحق أجبنا
وتحقق التحرير في عزم وأيمان = بقيادتك يا بوش خلّص نشبنا
وعدنا وأعدنا عمارها تاج الأوطان = حنّا تجاوزنا الجروح ووثبنا
لكن على الفرحة بقايا ونقصان = لا عادوا أسرانا تحقق طلبنا
وراس العكف هو الهدف سر واعلان = لا طيّروا راسه يطبق هدبنا
إن ما تهيّا زمرة الظلم تنهان = لا أقول راح الشر ولا أقول طبنا

وهذا القصيدة رد الشاعر الشيخ / خلف بن محدى بن غبين العنزي ويقول فيها :-

سر يا قلم واكتب تناظيم الألحان = زان المجال وللقوافي كتبنا
اكتب حسس قلب من الغبن حيران = ومن كثر ما تطري طواريه شبنا
قلب معذبني وأنا منه سهران = وبأسباب ميلات الزمان استصبنا
عبرت ما كنيت يوم الخفى بان = بالشعر يوم (ن) حان وقته أجبنا
رد (ن) على اللي قال زيف وبهتان = كاذب وحنا نكذّبه ما كذبنا
عضو الفلس أصبح مثل طير برمان = والله من موقف طلال اعتجبنا
طلال بن عثمان هايف وغلطان = يمدح وحنا منه ناخذ حزبنا
طلال يا مادح زعيم المريكان = عليك نلقي يالمنافق عتبنا
أخطيت مضمون الهدف يابن عثمان = حنا لكل اللي تقوله شجبنا
مدحت بوش وأنت مخطي ووهمان = وكذبت في مدحك شذوب شذبنا
وش عاد لو مجدت بالشعر شيطان = مدحت بوش وتسمية بوش غبنا
طلال مجد بوش في نظم قيفان = ونسي مواقفنا وكنه هزبنا
لا شك ما نقبل على النفس خذلان = يوم إن ابن مزعل بشعره لسبنا
والله يالولا اللي لهم قدر وكيان = لا أقول يا بعض الرجاجيل طبنا
خسران من يفعل بكم طيب خسران = لو كان من مقطع عصبكم عصبنا
نعم نعم أنتم لنا إجوار وإخوان = بالدين وإلا ما حسبكم حسبنا
المدح ما يزهى لكافر وخوان = يزهى على الصنديد مقدم عربنا
فهد صليب الشور خلفت كحيلان = زعيمنا الميمون خلص نشبنا
فهد صليب الشور حماي الأوطان = للعز حنا في وجوده وثبنا
له وقفة تصعب على فلان وفلان = والخير والله في وجوده صحبنا
وطلال يمدح بوش هيف بالأظنان = يمدح عميل اللي بجيشه حربنا
وبأسباب صاحبكم غدى الشمل شتان = وللفهد جيتوا يوم حنا إنجذبنا
وبالحال جبنا جيش بوش ومتران = وأيضا لقوات التحالف طلبنا
على الطلب جونا سريعين بإعلان = ويوم أخطا راي الغير للرائ أصبنا
ما هو غلى جونا مطاميع بأثمان = وبأسبابكم لهم خسرنا ذهبنا
وأيضا خسرنا أشناب في وسط ميدان = وبأسبابكم في أزمة الحرب شبنا
والله واللي فارض خمس الأركان = ما تدخل القوات لو ما رغبنا
واليوم تنسون المواقف والأكوان = العام يوم النار تاكل حطبنا
تنسون وقفات الفهد عالي الشان = مع شعب جابر يوم جابر ندبنا
من لاذ في ظل الفهد كايده هان = وجابر زبن يمه من الغبن زبنا
لولا الفهد ما عاد جابر لدسمان = فهد الفهود الوايلي هو جنبنا
ونعم بعبدالله ونايف وسلطان = سلطان زيزوم الحرايب جذبنا
ونعم بزيزوم المناعير سلمان = الصيرمي بحماه محد قربنا
نعم هل العوجا طويلين الأيمان = اللي نسبهم من معامق نسبنا
نعم هل العوجا ضريرين الأطعان = اللي بحد السيف هدوا صعبنا
نعم هل العوجا مقاديم الأظعان = قادوا مسيرتنا ولبوا طلبنا
نعم هل العوجا مواريث مرخان = في حبهم رب الخلايق وهبنا
نعم هل العوجا للأمجاد عنوان = شيوخ لهم في قمة المجد مبنى
نعم هل العوجا صماصيم شيخان = إخوان نوره من وجبهم وجبنا
حنا سعوديين بالفعل شيخان = وعن دارنا يوم اللقاء ما هربنا
حنا سعوديين كان الطلب حان = عدونا يدرى عواقب غضبنا
حنا سعوديين والفعل برهان = حنا لجار خانكم له ضربنا
حنا سعوديين لا ثار دخان = ومن يلتجي فينا فلا عنه غبنا
حنا سعوديين في وين ما كان = عدونا له المحابل نصبنا
حنا سعوديين في كل الأزمان = حنا العرب واصل العرب منتسبنا
حنا سعوديين لنا القوي لان = من اللي غدر فيكم خذينا ندبنا
حنا سعوديين يوم الزمن شان = حنا لكم مع شينة الوقت طبنا
حنا سعوديين بالفعل فرسان = ولا زال حنا حماتكم ما انسحبنا
يوم إن هدام العروبه بكم خان = حنا وقفنا دونكم واحتزبنا
حنا فعلنا أفعال شوف بالأعيان = وأنتم استجبنتوا من الخوف جبنا
ويوم تقهقر بالخطر كل جابان = حنا دحمنا للخطر واقتربنا
جيتوا لنا من الضيم تشكون الأحزان = تبكون هدام العروبه سلبنا
واليوم بادرتوا هل الطيب جحدان = وإليا حسبتوا غيرنا ما حسبنا
وعدنا الكويت وعاد دسمان فرحان = وفي عودة الدير تحقق طربنا
ولا فيه شكر ..... ولا فيه عرفان = وحنا تعبنا من سببكم تعبنا
والله من ينكر هل الطيب حيوان = والسب ما هو من طبايع أدبنا
قلته وأنا من ديرة عزها يصان = يا عز من حنا بجنبه حضبنا
وصلاة ربي عد هتاف الأمزان = على الرسول إعداد ما أرمش هدبنا

منقول مع خالص التحية وأطيب الأمنيات وأنتم سالمون وغانمون والسلام .

[خيّال العرفا]

مشكور وما قصرت ولا هنت

[خيَّال الغلباء]

خيال العرفا جزاك الله خيراً ولا هنت

[حزم الجلاميد]

مشكور وما قصرت ولا هنت

[خيَّال الغلباء]

حزم الجلاميد جزاك الله خيراً ولا هنت

[فراج آل ماضي]

لاهنت على هذا النقل الاكثر من رائع تسلم يمينك

[فراج آل ماضي]

لاهنت على النقل الرائع وسلمت يمينك

[خيَّال الغلباء]

إحساس شاعر جزاك الله خيراً ولا هنت

[كليب]

مشكور وما قصرت ولا هنت

[lion1430]

مشكور وما قصرت ولا هنت