مشيت يوم العفش بالجمس شلناه
والعين عقب موادع الربع فاحت
فاحت بدمعٍ حرق الخد واحفاه
وكومة حزونٍ للفواد استجاحت
وداع يامن بأول العيد زرناه
وعينه بثان العيد بالدمع ساحت
عوداً موادعنا له العصر مارضاه
عسى عباره تالي الوقت زاحت
وامٍ تعاين وين درباً عطيناه
ودموعها شلال دلو استماحت
في موقف الموتر بقت يوم سقناه
وابطت تخايل زيلته لاستضاحت
ولفيت من دون الحجاز وقراياه
وانظر لعين الشمس للغرب طاحت
وامشي ونفسي عيت المشي تشهاه
واقول كيف ان حلو الايام راحت
والليل طوّل والسفر طال ممشاه
وارقام كيلو سرعة الجمس باحت
والنور عين القط قامت تحده
لاولعّ العالي على البعد لاحت
والخط الاصفر تايره ماتوطاه
الليل كله واربعه ماستراحت
ماهوب يمشي له تحادي بممشاه
وكن المواتر بالمكاين تلاحت
على الطريق اللي مشينا صلبناه
لو المسافه للبعدين شاحت
وبحر الخليج الفجر بالعين شفناه
يوم الحمامه فوق الاغصان ناحت
غير متصل
العرض الشجري
