مساجلة شعرية بين شاعرين

[ابونحاء]

السلام عليكم ورحمة الله وبركاته

هذه مختارات من طرائف الشعر النبطي ارجو انها تنال جزء من اعجابكم

لتسليه وا الترفيه بعيدا عن تعصب الرسميات!!!!!!
--------------------------------------------------------------------
هذه مسـاجله بين شاعرين (ولا أعرف أسمائهم بالكامل )



الأول اسمه ضيدان . والثاني أسمه سعد

لقد زار ضيدان صديقه سعد

فتأخر سعد في تقديم القهوه والقدوع فقال

ضيدان :


جاك المسير مالقى منـك ترحيـب
.......... لاجبتلـه قهـوه ولامـن قدوعـي

ياليتني دورت غيـرك معازيـب
........جيتك جويع ورحت منّك بجوعـي

الظاهر انك ماتعـرف المواجيـب
.......لاشك طبعك يختلف عن طبوعـي

حنّا لاجانا الضيف ننفض له الجيب
.........ونجيبله من كـل شكـلٍ ونوعـي

عاداتنا والرزق من عالـم الغيـب
........هذا وانا ابخل واحدٍ مـن ربوعـي




فجاء سعد بالقدوع والقهوه وقال غاضبا
:





اقدع عسى يقدع على راسك الذيب
..........في خايعٍ مابه من الناس دوعـي

متعطـلٍ بالبـر قبلـي تناقيـب
..........من ليلة الجمعه ليـوم الربوعـي

ومروك ناسٍ غايب عنهم الطيب
.........وخلوك وحدك في مكانٍ يروعـي

ثم جاك ذيبٍ ماسنونـه بتركيـب
.........ذيبٍ ولد ذيبٍ وشـرس قطوعـي

سوّى بك سواةٍ على غير ترتيـب
.........يجزع لها قلب الشجاع البتوعـي

مرحوم ياعودٍ كسا راسه الشيـب
..........هنديته تـذرف عليـه الدموعـي





وهذه مساجله ايضا بين سعد وضيدان عندما طرأت على سعد فكره

جهنميه وعرضها على ضيدان وقال
:


ضيدان ماودك نشكل عصابه
.........نحتل بعض بنوكها والمحلات

اما يجيلي ولك قدر ومهابـه
...........والا تبيتنا بيـات الشريفـات

والرجل ودك يشتهر في شبابه
........بالطيب والا بالعلوم الرديات




ولكن ضيدان رد على هذا التفكير المتهور بحكمه وبعد نظر قائلا
:







لاتحسب انّا ياسعد وسـط غابـه
.......هاللي تراوالك تراهن عمـارات

وموضوعك اللي جبت كله غرابه
....والظاهر انّه من سابع المستحيلات

واخاف لاتنبـح علينـا الكلابـه
.....ثم هات نسلم من مخاليبها هـات

ويابوك ماعمري دخلـت النيابـه
.....ومن العمر ماباقيٍ كثـر مافـات

وان كان تبغى الراي قبل ايغدابه
....من واحدٍ جرب جميع الحيـالات

خل الحطب للي يعرف الحطابـه
.......نهارنا شمـسٍ وبالليـل لمبـات

وسلامتكم



منقول

[رنيه المفيلحي]

ابيض واجه والله يبيظ وجيه الشعار ولك تحياتي وتقديري

[دسمان بن مشلهب]

بسم الله الرحمن الرحيم
اقدع عسى يقدع على راسك الذيب
..........في خايعٍ مابه من الناس دوعـي

مشاركه ممتازه يابو نحــــــــــــــــــــاء

وننتضر منك مثل هذة المشاركات الجميله

وتقبل تحياتي...............................

[أبوعبدالله]

ما قصرت يا ابو نحا بيض الله وجهك

وصح لسااااان الشاعرين

ممتازه جدااااااااااااااااااا

ابو عبدالله

[سعود الصندلي]

مشكور يابو نحاء
مسجلتين طيبات مره
ولكن الربع قريشات ولا لا

[مفيلحي وعتز]

ابو نحا
الف شكر ولك اطيب تحيه على هذا النقل الرائع وننتظر المزيد

[عيسى السبيعي]

الله يعطيك العافيه يا بونحا

على هذه المساجله المنتازه بالحيل

[02]تحياتي

الواسطه[/02]